Ynne ka 1 tarik da man ko leh ka bynta wa khaddooh kawa tip leh kam ka Phase-7 kani ka Lok Sabha Election 2024 heiwa i thap Vote da sdang i ha ki 57 tylli ki Parliamentary Constituency wa em ha 8 tylli ki jylla wa UT.
Kini ki Constituency wa thap Vote ynne toh kiwa em ha Bihar (8 tylli na 40 tylli), Uttar Pradesh (13 tylli na 80 tylli), West Bengal (9 tylli na 42 tylli), Himachal Pradesh (4 tylli na ki 4 tylli), Jharkhand (3 tylli na ki 14 tylli), Odisha (6 tylli na 21 tylli), Punjab (13 tylli na ki 13 tylli) waka Chandigarh kawa em kawi donhi ka Constituency kawa man leh kam ka Union Territory.
I thap Vote ynne man ko leh ha Varanasi kawa man ka Constituency wa yaleh da u Narendra Modi yow man Prime Minister ha ka sien wa le heiwa da em 6 ngut ki kyrtong wa yakhun neini.
Kiwi de ki heh BJP wa yaleh ynne toh u Ravi Shankar Prasad uwa man kam u MP wa katni na Patna Sahi heiwa daw yakhun pyrchah u wa u Anshul Avijit na ka Congress uwa man leh kam u khon ka Lok Sabha Speaker warim, ka Meira Kumar.
Na Mandi daw yaleh Election hei sien wa nyngong da ka Kangana Ranaut kawa man kam ka Actress kawa yieñ kam ka kyrtong BJP wei daw yaleh ko pyrchah ya u Vikramaditya Singh uwa man kam u khon u Montri Rangbah warim ka Himachal Pradesh.
Na Hamirpur, u Montri sorkar u Anurag Thakur daw yaleh u yow ksoh biang ya kani ka Constituency.
Na Mayurbhanj kawa man ka Constituency wa boon ki jaitbru ri-loom kamjooh i thaw wa khlan bha ka President ka ri, ka Droupadi Murmu heiwa i chnong yong ka iwa tip kam i Uparbeda toh iwa em hapoh kani ka Constituency, ka BJP da yooluti ko wa u ye u jop biang.
Ki jylla wa ki Constituency kiwa thap Vote ha ka Phase-1 itæ ka 19-04-24, da hap ki wow yang 45 sngi hadooh wow niaw Vote ha kani ka 4 tarik.
Hapoh ka Phase-1 da thap Vote ha 102 tylli ki Constituency kiwa em ha 21 tylli ki jylla.
Ka Phase-2 toh kawa da thap Vote ha ka 26-04-24 ha ki 88 tylli ki Constituency ha ki 13 tylli ki jylla.
Ka Phase-3 toh kawa da thap Vote ha ka 07-05-24 ha ki 94 tylli ki Constituency kiwa em ha ki 11 tylli ki jylla.
Ka Phase-4 toh kawa da thap Vote ha ka 13-05-24 ha ki 96 tylli ki Constituency wa em ha ki 10 tylli ki jylla.
Ka Phase-5 toh kawa da thap Vote ha ka 20-05-24 ha ki 49 tylli ki Constituency wa em ha ki 8 tylli ki jylla.
Ka Phase-6 toh kawa da thap Vote ha ka 25-05-24 ha ki 58 tylli ki Constituency wa em ha ki 8 tylli ki jylla.
Ka Phase-7 won toh kawa da thap Vote ynne ka 01-06-24 ha ki 57 tylli ki Constituency wa em ha ki 8 tylli ki jylla.
Discussion about this post