Jowai : Hadien wa da oor ka bus Night-super wa wan na Silchar wow lai cha Guwahati, cha synrang ha Sonapur ha ka miet yong ka 14 tarik heiwa da yap hadooh 29 ngut kiwa chong ha ka, wei da mynsoo joor 9 ngut wei dang pteiñ u sai ya ki metyap hadooh ynne.
Ynnin ka sngi da ye u sai 9 tylli ki metyap neiliang ki pulit, ki chipai BSF wa ki paidbah ynne ka sngi da ye ki u sai sa kamwa 18 tylli.
Kini ki wa da ye u sai ynne da ong wa duk u pynemkaam da ki diñ welding yow ah ya ki bynta ka bus neibhah wa em kiwa chah ban ha ka. Heijooh i por da duk leh u kyrriah ya ki moo kiwa heh wa em kiwa da chah ban ha ki.
Waroh kattu da ye u sai hadooh 27 tylli ki metyap wei katkam ka yutip kiwa yap em ki 29 ngut wei dang sah sa kamwa 2 tylli ki metyap ki wympu ye u sai hadooh ynne i janmiet.
Katkam ka list kiwa chong ha kani ka night-super wa em ha ka Arhans Tours and Travel ka pyllai ya kani ka bus waroh kiwa chong ha ka em ki 34 ngut chirup wa u Driver wa u Handyman.
Kiwa lait im em ki 9 ngut katwa kiwa yap won em ki 29 ngut iwa mut waroh kiwa chong ha kani ka bus em ki 38 ngut tangwa ha ka Passenger List ka company em 34 ngut, iwa mut wa ye u man wa ki 4 ngut da ku ki na chiteiñ luti.
Ya ki metyap wa da ye u sai ynne da pynkit ya ki cha Khliehriat CHC yow leh ya iwa emkaam.
Da pyntip leh wa daw yaleh u sai ya ki metyap wa dang sah ha ini i thaw.
Discussion about this post