U Lalrinzuala Thieite (24 snem), u khon ka Zoramsiam Thieite kiwa chong wa sah ha Iawthymme, Ladthadlaboh, Jowai da yoh biang u yei naam 1st Runner-up yong ka Mr. Northeast Superstar, 2021 kawa da pymman ha Shilpgram, Guwahati, Assam.
Ha kani kaykob bha chynrang da yoh u leh wow rah yei naam u Mr. Photogenic.
Ya kani ka tamasa da pynman da ka Aakriti Events Pvt. Ltd wei da wan chong bichaar da ka Kiran Boro (Women of the year 2020, Mrs. Earth Universe 2017 Durban South Africa), ka Manika Sinha (National Director of Mrs India International Global 2021, Mrs. International World Ambassador 2018, Mrs. India Global International 2017, Mrs. Assam Diva Popular 2017), u Sankar Kalita (Actor/Choreographer, Exclusive India Award Winner, India Creative Award Winner), Dr. Karobee Hazarika Choudhury (District Nodal officer Ayush Kamrup Metro, Social Worker, Writer & Bihu Dancer).
U Lalrinzuala da ong u wa ka thong yong oo wow em ha kani ka yakob toh yow e mynsien ya kiwa em i sap i phong yow lai ki chakhmat deiwa chaniah skem ya idæ wei ym toh u pait yong kiwi don hi.
Da pyntip u leh wa oo toh uwa ka-it ha ki kaam Acting, klam paidbah, Basketball, uwa maya mrad, uwa kwah wow e mynsien wei pynchlur ya ki khynroo khyllood.
U Lalrinzuala toh uwa da pyndep ya ka Bachelor of Arts (English) na Kiang Nangbah Government College, Jowai wei da kreh u yei kaam yong oo hi wow Supply Mask, Marketing, Actor wa Modelling.
Ka thong yong oo wa rap chakhmat toh wow jop ya ka Mr. India, Professional Public Speaker.
Kam wow pynkynmoo wa u Lalrinzuala toh uwa jooh man leh u State General Secretary warim ka National Student Union of India, u Mr. Face of Tomorrow, 2021, u Mr. Perfect Body Iconic Face of Northeast, 2021, 2nd Runner up Mr. Ladthadlaboh, 2019 wei Mr. Kiang Nangbah Government College, 2018.
