Ka Meghalaya Signbank Mobile App wa pynmih da ka yung krehkaam u Commissioner for Persons with Disabilities, da jop ko yaka 8th eNorthEast Award 2023, hapoh ka kyrdan Learning & Education. Kani ka Award toh kawa da saam haka yalang wa da pynmanlang da ka Council for Social and Digital Development (CSDD), Digital Empowerment Foundation (DEF) waka North East Development Foundation ha Guwahati haka 25 tarik u bnai wa dep.
Kani ka Meghalaya Signbank App toh kawa pynyoo kammon wow yaklam wa ki wym ye u klam neidaw wa duna i bor chkoor kiwa pynemkaam da ki kti namo ka Sign Language heiwa hapoh kani ka App da em lut waroh ki dur wa pynyoo kammon pynyoo ya ki kyntien yow suk u yaklam nadooh ki kyntien wa suk wa ki kyntien wa rap kyllaiñ.
Kani ka App man ko leh kawa suk bha u pynemkaam da kiwon kiwon wei ye ko wow pynyoo ya ki Sign khlem chimpor yow suk u yaklam wa ki wym tip u klam kiwa duna hei bor chkoor.
I rukom krehkaam ko toh deiwa Type ya i kyntien hapoh kani ka App wei kani ka App won daw pynkylla ko ki cha ka Sign Language kawa sñiawthooh kitu kiwa ym ye u klam iwa daw pynyajan ya ki bru wa ki wym ye u klam.
Ye leh u thoh da ka ktien English, Khasi wa Garo hapoh kani ka App wei kani ka App daw pynyoo ko ya ki Sign Language heidur i Video leh iwa pynsuk chooh ya ki wym tip u yaklam wa kiwi lada em ki heiwon heiwon hapoh ka jylla heiwa yaka Sign Language leh ye wow pynkylla ka cha ka ktien Khasi wa Garo.
Ya kani ka Meghalaya SignBank da sdang deiwa ya krehlang ka yung krehkaam u Commissioner for Persons with Disabilities, Meghalaya deilang waka National Informatics Center (NIC), Meghalaya, ka Dr. Melissa G. Wallang, Assistant Professor of Linguistics ka North East Regional Institute of Education, kawa man ka chnat ka NCERT, Shillong deilang wa kiwa duna hei bor chkoor wa ki bru wa chempang ha ka Sign Language napoh Meghalaya.
Discussion about this post