Ka JSU ynne ka sngi da looid noh ko ya ka lama rong yong wa da booh ha Nongtalang CHC kattu la 9 bnai hadien wa da poi biang ka 108 Ambulance hapoh Amlarem Sub-Division nadooh ka 5 tarik uni u bnai.
Kam wow pynkynmoo ka JSU da dawa ko na ka sorkar nadooh u snem 2018 wei da booddien ko yeini na u Montri ka chnat i chait i khiah u AL Hek ha u 2020 wa na u James Sangma ha u snem 2021 kamjooh na u Ram Kumar, Director ka NHM wa u Dr. Aman War, Director ka DHS(MI) wa u MLA ka thaaiñ.
Neiliang u General Secretary ka JSU Central Body u Treiborlang Suchen da ong u wa da sdang yeini i dawa hadien wa yoh ya i ujor neidaw wym em ka kari 108 ha ka thaaiñ neibhah ka kari wa jooh em da rah noh ya ka cha kiwi ki thaw iwa da ktah bha ya ki paidbah.
U Eddy Kery Pohtam, u President ka JSU War Jaiñtia Circle da pynsñiaw u yei sñiawngooh ya kiwa embynta wow yaleh u yoh biang ya kani ka 108 Ambulance Service hapoh ka thaaiñ nadooh ki Doctor ka CHC wa ki PHC, ki Director ka chnat DHS wa NHM, u SDO warim ka Amlarem Civil Sub Division u Abhilash Baranwal wei khamtam ya ki paidbah kiwa kyrchaan ya ka seiñ ha ini i kaam.
U Kerrydiam Lamin, General Secretary ka JSU War Jaiñtia Circle da ong u wa emkaam wa ki paidbah u tip ki wow Phone cha u 108 hawa em ki kaam wa jhan wym ye yang de (Emergency Case) neibhah ini man i i yarap na ka sorkar khlem su wei hapoh ki kari 108 em ki tiar wa emkaam namo ki Basic Life Support System wow yarap pynlait im ya kiwa kjut wa chitom.
