Jowai: Ka sorkar jylla da pynbna ko wa u M.S. Rao, IAS (1987 Batch) uwa man kam u Chairman ka Board of Revenue and Additional Chief Secretary ka sorkar Meghalaya, Revenue & Disaster Management Department wa kiwi kiwi ki chnat sorkar da thung ya oo kam u Chief Secretary hadien wa chongngiah noh u P.S. Thangkhiew, IAS kam u Chief Secretary ka Meghalaya haka 31-12-19.
U M.S. Rao manda chimkti u kam u Chief Secretary ka jylla daw man u leh kam u State Vigilance Commissioner ka Meghalaya wei u pteiñ man kam u Chairman ka Board of Revenue.
Ini i thung Chief Secretary ya u Rao ym em man ko iwa sñiawyahap u Additional Chief Secretary u Hector Marwein uwa da lai rah ya ini cha u Chief Secretary u PS Thangkiew wa u Rao uwa man IAS haka 1987 Batch da yoh chwa u wow man Chief Secretary neidaw wa u Marwein wa man IAS haka 1985 Batch da toh wow pynku kyrdan chwa ya oo kam u ‘Senior’ ym toh ya u ‘Junior’ yong oo.
U Marwein haka chithi wa phah u cha u Thangkiew da ong u wa oo da chakri u yaka sorkar kattu la 34 snem ha kiwa boon ki kaam wei da chah pyndooh u yei hok u khlem em i daw wa biang wei oo kattu da sah sa 8 bnai donhi chwa wow kut ka chakri yong oo.
Chooh chooh da ong u wa yaka kyrdan Chief Secretary da e cha ki Senior dooh ki sahep IAS wei ini i leh wow e cha ki Junior daw booh nongmuna kawa sih kawa daw wanrah daka yakob para IAS wow yaknieh chuki wei da kyntu u yaka sorkar wow pyrkhat biang sa chisien ya ini.
Discussion about this post