Ka syiem ka ri England ka Queen Elizabeth II ynnin ka sngi Bibar da chem wa da yoh ko ya u COVID-19 hadien wa Test ya ka heiwa da pyntip toh wa da em ko i chitom wa malu mala.
Ka Queen Elizabeth toh kawa da em 95 snem i rta wei da em ko ha ka khet la 70 snem, wei da pynkreh leh wow lehkmen ya ka Platinum Jubilee yei man ko kam ka syiem ha uni u snem.
Ka Queen Elizabeth toh kawa da yoh pura yei tika wei hei heh rta na i por cha i por da chah sumaar ko.
Da pyntip wa ka Queen Elizabeth u pteiñ hi ko yei kaam yong ka napoh Windsor Castle i thaw wa em ko wei u pteiñ ko leh wow yoh yei sumaar ha ini hi i thaw.
Da em leh kiwi ki wakreh hapoh ka Windsor Castle kiwa da yoh COVID-19 iwa man leh i thaw wa pynlut ka Queen Elizabeth yei por yong ka.
U kurim ka Queen Elizabeth, u Philip da khlaad noh u ha u Naitung (Apr) 2021 hei rta wa 99 snem. U khon yong ka uwa toh u ku khet, u Prince Charles (73 snem), ha u bnai wa da dep da yoh COVID-19 u hei sien wa ar wei da yachem chwa u waka syiem ha ki sngi chwa.
