Napyrdi ki 93 ngut kiwa dang yoh COVID-19 ha Meghalaya ynne ka sngi, 2 ngut toh ki wakreh ka kot khubor pharæng wa pynmih napoh ka jylla ka The Shillong Times wei kini kynthup ya uwi u Helper wa uwi uwa yah kari.
Katkam wa pyntip u DHS(MI) u Dr. Aman War, lyngba i booddien, da chem wa da em hadooh 70 ngut ki wakreh ha katai ka kot khubor kiwa em hei maa na u COVID-19 wei neiliang ki bor District da pynman ki yaka takit wei i rai u chong ko haka sorkar wow khang noh chwa chipor ya katai ka yung krehkaam katai ka kot khubor lane deiwa e laad ya ki wow kreh bait napoh ka thaw kreh khlem da mih wow lai cha kiwi ki thaw.
U DHS da pyntip u wa nyngkong ha Shillong Times da em uwi wa yoh wei hadien da yoh sa kini ki arngut wei ya ka takit wa da dep leh wei da e cha ka sorkar wow rai ko neidaw wa ki laad pathai khubor da kheiñ ya ki kam ki Essential Service wei ka sorkar daw chim ko yaka rai kammon wow khang kset ya katai ka thaw.
Da pyntip u leh wa yaka takit da leh da ki Doctor wa ki Magistrate heiwa da chem palat 70 ngut kiwa em hei maa namo ki High Risk Contact.
Ha iwi tawon i liang, ka Dorbar Chnong ka Kenche’s Trace, Oxford Hills wa Rilbong da kyntu ki yaka sorkar wow pynbna yaka yung krehkaam ka Shillong Times kam ka Containment Area chi syndon.
