Shillong: U Director of Health Services ka jylla, u Dr. Aman War da pyntip u wa na ki 56 ngut waroh kiwa yoh ya u COVID-19, 16 ngut toh kiwa yabi na kiwa yajan wa kiwa em ya uni u khñiang, katwa kiwi toh kiwa liwan na baar jylla.
Hawa klam wa ki laad pathai khubor u DHS da pyntip u wa kiwa em bait hapoh ka jylla toh kiwa yabi ya utai u khñiang kiwa kynthup yaki 13 ngut ha i jia wa nyngkong kawa na Bethany Hospital, Shillong, katwa 3 ngut toh kiwa yabi naki BSF.
Neiliang u Montri wa pait yaka chnat i chait i khiah, u AL Hek da pyntip u wa ynnin i miet uwi u bru wa naka chnong Khanapra, Ri-Bhoi District da yoh u ya uni u khñiang, ya uni u bru da Test Positive ha Assam, tangwa da wan noh u cha Meghalaya ha i por wa yoh yaka Report neibhah wa kreh u ha Greenwood Khanapara kawa em cha chiliang sarok kawa haap hapoh ka jylla Assam.
Da pyntip u wa hadien wa yoh yaka Report wa yoh uni u bru ya u COVID-19, neiliang ka Assam da pyntip noh ko cha ki bor pynlai District ha Ri-Bhoi, kiwa da lai wow chim ya ki nongmuna wow phah Test biang heiwa da chem wa em u ya u COVID-19 wei da pynkit noh cha Covid Centre kawa em ha Nongpoh.
Ha iwi i liang u Hek da pyntip u wa kiwa yoh COVID-19 ha ka jylla hadooh kattæ da em ki 56 ngut, kiwa chait da em ki 43 ngut (chait uwi u chipai ka Assam Regiment), katwa kiwa dang em ya u khñiang em ki 12 ngut. Da pyntip chooh chooh wa ki nongmuna wa da phah Test da em ki 19974, 19679 kiwa man Negative wa 260 tylli kiwa dang yang yaka Report.
Da pyntip u leh wa naki 12 ngut kiwa dang em ya u COVID-19 kattæ, 6 ngut toh ki chipai BSF ha East Khasi Hills, ha East Jaintia Hills 1, Ri-Bhoi 2, South West Garo Hills 2 wa ha Tura 1.
