Ha Meghalaya da em sa uwi wa yoh COVID-19 ynne ka sngi yow pynpoi ya waroh kiwa dang em ya uni u khñiang (Active Case) cha ka 29 ngut.
Ya ini da pynbna leh da u montri rangbah ka jylla u Conrad K Sangma uwa da pyntip wa uni u bru toh uwa liwan na Assam wei da em u ha Tura.
Neiliang won u DC ka West Garo Hills District da pynti u wa uni u bru toh uwa em hapoh Quarantine wei daw kyrriah noh ya oo chapoh ka Corona Care Centre. Wei wa uni, kiwa dang em ya u COVID-19 ha West Garo da em ki 3 ngut.
Da kyntu u leh yaki paidbah wow yait u lai cha Assam khamtam cha Guwahati lait noh iwa ym hoi de u dam. Da pyntip u leh waroh kiwa wan na Guwahati da booh yaki ha thaw leh Quarantine wa da pynkhreh daka sorkar. Ym chah leh ya kiwon kiwon kiwa ym em leh yaka Online Registration wow wan ki. Ya kiwa psiah naki thaw wym toh kiwa da booh daka sorkar daw pynchitom yaki katkam ka aiñ Epidemic Disease Act wa kiwi de ki aiñ.
Da pyntip u leh wa ynne da leh yaka Random Sampling namo ki chim yaki nongmuna naki bru kiwa em cha ki thaw wa pynman yaw kam kiwa chong dai dukan, ki wakreh sorkar, ki pulit, kiwa yah kari wa kiwi kiwi yow pyntikna wa ym yoh laad uni u khñiang wow poor.
Naki thaw kiwa da kheiñ kam kiwa em hei maa nei lai i wan ki bru, da chim 130 tylli ki nongmuna ha kylleiñ ka District.
Da kyntu u leh yaki paidbah wow man kiwa deiñ Mask haki thaw paidbah, wow leh ki yaka Social Distancing wei wow siat khooid yaki kti.
Kattæ hapoh ka jylla da em 73 ngut kiwa da yoh COVID-19 heiwa na kini, kiwa chait da em ki 43 ngut, kiwa dang em ya uni u khñiang da em ki 29 ngut wa uwi wa yap.
