Soo ngut ki dkhot seiñbhalang wa kynthup ar ngut na ka seiñ Federation of Khasi Jaintia and Garo People (FKJGP) wa ar ngut naka seiñ Khasi Students’ Union (KSU) da yoh jamin noh ki wei da yoh ki wow mih na patok ynne i janmiet ka 28 tarik.
Kini ki dkhot seiñbhalang toh kiwa chah kem hajrong i pynbaad emkti wow dat bru haka sngi wa pynman yei lai paidbah namo ka Rally hajrong i dooh kreh kawa da pynman ha ka 28 tarik u bnai wa da dep.
Ya kini ki soo ngut da lai choo da kiwa yahkhmat wa hakhmat, kitæ u President ka FKJGP, u Dundee C Khongsit wa u President ka KSU, u Lambokstarwell Marngar, kiwa ha-yung ha-sem wa kiwi kiwi kiwa yahkhmat na Shillong District Jail ryngkat i lehkmen wa i kyriaw.
U President ka FKJGP, u Dundee Khongsit da ong u wa i yakhun u lai bait chakhmat neibhah i chah kem toh nei daw bah ki khynroo. Da ong wa ini i kem da e mynsien chooh chooh neibhah i chah kset ha phatok toh iwa da pynjanai chooh chooh.
U President ka KSU, u Lambok Marngar da ong u wa i psiah patok ym toh wa leh ki yei kaam wa bakla tangwa wow pynyoo chooh chooh chakhmat yei eh kiwa boon walang. Da ong wa ka KSU waka FKJGP da dawa ki da slem wow em ki aiñ ha ka rukom thap kaam yow lait nei thap kaam tooh du ya ki bru kiwa tipmit Montri sorkar. Da ong wa ki seiñbhalang ym chong ngiah ki wow yaklam yei yong kiwa boon walang khamtam neibynta ki khynroo khyllood.
Ha iwi i liang, uwa yahkhmat ka KSU da ong u wa ka patok toh ka skurbah kawa pynkhlan yei mynsien maya ri wei ym pyndooh mynsien. Da beiñ u leh ya ka sorkar deiwa ong wa boonsien boonkaam ko wei dei chem miet bait lai kem ko ya ki dkhot seiñbhalang, wei ha ini ki pulit Assam won da nang chim ki yei mynsien yong ki paradoh parasnaam wei ini toh i pteiñ i bakla yong ka sorkar.
