Ka Hindustan Aeronautics Ltd (HAL) ynne ka sngi Bibar da soi soskular ko wa ka Alliance Air Aviation Limited yow e wai ya ar tylli ki lieñsuiñ kiwa tip kam ki Do-228 wow pynemkaam du hapoh ka jylla Arunachal Pradesh, wei ini man ka leh kam chibynta ka Regional Connectivity Scheme (RCS).
Ki lieñsuiñ ka HAL ki Do- 228 toh kiwa yahaap bha wow pynemkaam hapoh ka thaaiñ North East heiwa ym emkaam ki ya u sarok wa jrong yow hær wei wow hiar.
Ini da man ko leh ka luti thymme ya ka HAL wow rap em ha ki yaw ki haat kamai deiwa pynemkaam rap boon kini ki Do-228 hapoh ka ri.
Neiliang u Montri Rangbah ka Arunachal Pradesh, u Pema Khandu da ong u wa ynne ka sngi toh kawa emkaam ya ka jylla kawa da chem chitom bha neidaw i rukom man i thaw i bhaw wow pynyabi ya iwi i thaw wa kiwi wei kattu daw suk noh.
Ka HAL toh kawa da jooh pynbiang lieñsuiñ du ya ki kaam yada ri wei ka chnat Transport Aircraft Division, Kanpur ka HAL da sdang noh wow chna lieñsuiñ neibynta wow pynemkaam paidbah deiwa chna ya kini ki Do-288.
Kini ki lieñsuiñ toh kiwa hoi u chong 16 ngut ki bru kawa ye u pynemkaam da ki VIP, ki bru paidbah, u chna leh kam ka Air Ambulance, Para Jumping, u kit tiar wa kiwi kiwi de.
