Ka Department of Telecommunications (DoT), North East License Service Area (LSA), Shillong ynne ka sngi da wai ko ya ka 4G BTS Site ka Reliance Jio Infocomm Ltd (RJIL) deiwa booh ya ka 40 Meter Ground Based Tower (GBT) ha chnong Jair, Ri-Bhoi District kam chibynta i lehkmen yei dap 75 snem i yoh laitlooid ka ri wa da e pyrtuid Azadi Ka Amrit Mahotsav.
Ka chnong Jair toh kawa em 70 Km na Shillong tangwa da chimpor palat 3 kynta yow poi. Katkam i yukheiñ ka DoT, da em 6459 tylli ki chnong ha Meghalaya, heiwa na kini, da em 4818 tylli ki chnong wa em ya ka Mobile Signal, wei deiwa em ya ka Base Transceiver Station (BTS) ka RJio ha chnong Jair, da ku cha 4819 tylli ki chnong.
Ha kani ka sngi da emlang u Ajay Kumar Sahu, Sr. Deputy Director General; u Ashok Kumar Jain, Deputy Director General (Compliance); u Dilip Kumar, Deputy Director General (Rural); u Salim Subas Bara, Director (Compliance); u Yogendra Singh Sisodia, Director (Administration) wa u Dilip Singh Aswar, Director (Rural) kiwa mihkhmat ya ka DoT North-East deiwa emlang u Vikas Pareek, u Ranjeet Kumar wa u Jibesh Biswas naka RJIL.
Najrong wow pynyoh Network wow yaklam Phone, ka BTS daw yarap ko wow pynyoh ya ka Wireless Internet kawa smat bha ha kani ka chnong wa kiwi kiwa em chajan.
Daw yarap ko leh wow pynyoh ya ki yarap sorkar kam ki e-governance, e-health, Online Education, ki kaam uiñke suwari, ki e-commerce wa kiwi kiwi de yow pynsuk yei im kiwa chong chnong cha palatsor. Ha kani ka sngi wai da em leh 23 ngut kiwa chong chnong kiwa chim ya ka Mobile Connection pyn ha ini i thaw.
U tre ini i thaw wa booh ya kani ka Tower, u Emanuel Lyngdoh deiwa emlang u Secretary chnong, u Paulus Mynsong wa kiwi de kiwa chong chnong da pynsñiaw ki yei kmen wa palat 700 ngut kiwa chong chnong ka Jair, wa 1200 ngut kiwa chong chnong ka Lamalong wa kiwi de kiwa em chajan kam ka Sonidon, Mawbri Makaleng, Pamphlang, Umkra wa kiwi kiwi de daw yoh myntoi bha ki na kani ka Internet iwa daw pynjan ya ki wa ka ri deilang waka pyrthai waroh kawi yow wai laad yei ku i paar.
