Jowai: Ka Rotary Club Jowai dei sñiawkhia ya ki kaam wa da leh ka Dorbar Chnong Mihmyntdu heiyatoh wow e i chakri ya ki khon ka chnong ka thaw ha kam ini i por wa em ka khlam COVI-19, da chim ko wow pynkup burom ya ka Dorbar Chnong Mihmyntdu da ka Appreciation & Recognition Award 2020 ha kani ka sngi Khyllaw 21 u Naisaphra.
Ya kani ka yalang leh burom da pynman ha yung Dorbar ka Mookynphad Mihmyntdu hei emlang u waheh chnong Mihmyntdu u Abul Phawa, Symbood Waheh Chnong, Secretary Dorbar Chnong u Kmenlang Shylla wa kattu katni ki manbei manpa ka chnong Mihmyntdu.
U Rtn. S.K. Lato hei e kyntien yahkhmat da khanna pynsñiaw u yei lai luti ka seiñ wow kdar, u sylli u pait yei kitkhia ki chnong ki thaw kiwa e i chkari ya ki bru wa dawa u yoh yei yarap ha kam ini i por wei hadien i wyrchaw liang wa nang ya ki kaam yong ki chnong ki thaw waphær, da chem wa ka chnong Mihmyntdu toh man ko kawi kawa toh hok u yoh yeini i burom heiwa da em ko hadooh 5 tylli ki Quarantine Centre wa 173 ngut ki bru kiwa kynthup ki khon ka chnong Mihmyntdu kamjooh wa kiwi ki lok kiwa na baar.
U waheh Abul Phawa hawa klam hajrong ini i burom wa da e ka Rotary Club Jowai, iwa hakhmat e u i sñiawngooh wa khroo yow Blai neitæ iwa bood ya ka Rotary Club Jowai, wei kitbok kitrwiang u leh ya kani ka seiñ kamjooh ya ki dkhot yong ka. Kam uwa yahkhmat watoh u pait yei miat i bha ka imlang sahlang yong ka chnong Mihmytdu, ong u leh i yoh yeini i burom toh i yakrehlang yong i waroh kam ki khon ka chnong nadooh ki khian hadooh ki heh, wei yooluti leh wa i mynsien yakrehlang u ye chooh chooh u wanrah yei miat i bha wa paka hapoh ka chnong ka thaw waroh kawi.
Kiwi kiwa da e kyntien ha kani ka yalang toh u Symbood waheh Chnong Mihmyntdu, u Rtn. Dr. Kameswar Singh Elangbam, Assistant Governor, Zone X RI District 3240 wa u Rtn. Longda Bamon, Community Service Director.
