Kam chibynta ka laad pynku yei puræ puthi, i tip i stad ha ki khynnah katkam wa yah ka juk ka por, ka yung krehkaam u Block Development Officer, Laskein C&RD Block, West Jaintia Hills, u Dr. F.R. Shadap ha ka 19 tarik uni u bnai u da wai paidbah u ya ka Children’s Adolescents and Digital Library ha chnong Mooshrot hei emlang ka Weimonlangki Biam, Block Technical Assistant (BTA) Sahsniang Circle, Laskein Block.
Da emlang leh ha kani ka sngi u waheh chnong ka Mooshrot, u Janai Suchiang, u Secretary chnong u Jetison Tyngkan, ka Sankapaya Biam, Secretary VEC, u Chanky Lyngdoh, Adviser, u Romingstar Lamare, Co-Adviser wa ki paidbah wa chong chnong.
U BDO hawa klam ong u ya kani ka Library da pynwandur kyrpang neibynta ki khynnah wa ki khon khynroo yow yoh ki yei tip i stat katkam ka juk thymme, heiwa daw em nadooh ki kot puræ, ki kor Computer deilang ka bor Internet yow ye u thooh u yoh u tip ki yeiwa kwah ki.
Ong u wa ha kani ka yung ye ki khynnah u yoh yei tip i sñiawthooh yei wym em sikai hapoh skur i wow yarap e mynsien ya ki yeiwa phær wa ya iwon iwon iwa kwah ki.
Ka Weimonlangki Biam da pynsñiaw ko hajrong i emkaam u yakrehlang neibynta i roi i paar waphær waphær ka imlang sahlang.
Da ong haroh ko wa i yutip i chemphang waphær waphær yarap i wow ye u lai chakhmat ya ka thong i jop.
Neiliang u waheh chnong da sñiawngooh u ya u BDO neibynta kani ka Digital Library, wei kani toh ka laad ka luti wow yarap pynmyntoi bha ya ki khynnah wa ki khynroo ka chnong.
Da pyntip haroh u wa ka chnong Mooshrot em ko kamwa 508 tylli ki manyung wei ki bru em ki kamwa 3,000 ngut najrong wa pynsñiaw u leh ya i roi i paar wa emkaam hapoh ka chnong, kamtæ kyntu u wow pteiñ ki yei e buit, i yakrehlang wei e yarap ya ka chnong.
Ha kani ka sngi da yoh leh i chaad na ki dkhot ka Village Organisation (VO) Mooshrot.
Chwa ini da yoh i klam pdiang na u Romingstar Lamare, ha ka yalang wa pynlai da u Secretary ka chnong.
Discussion about this post