Ka Santa Mary Shylla kawa man kam ka MLA yong ka Sutnga-Saipung Constituency, ha ka 11 tarik uni u bnai da wai paidbah ko yaka madan kynjatbol namo ka Futsal Playground ha ka chnong Narwan hei emlang u Abhilash Baranwal, Deputy Commissioner, East Jaiñtia Hills District, u Waheh Chnong, Secretary Chnong wa ki dkhot ka Narwan Social & Cultural Sport Club.
Ya i pynlut pynsep hei wow chna ya kani ka madan Futsal da yarap poisa na ka District Mineral Fund (DMF) ka East Jaiñtia Hills District.
Ka MLA hei klam yong ka kam ka kongsan da yaroh ko ya kiwa da leh yei kaam wa bha hei wow kyntu kynrong ya ki khon khynroo khyllood ka thaaiñ kiwa em sap wow yalehbol, chooh chooh da kular ko leh wow yarap pynbha ya kani ka madan deiwa booh nadooh ki thaw paitke (Gallery), ka painkhana wa kiwi de kiwa emkaam kiwa yalehke ha ki sngi ki por wa daw wan kamjooh leh da kyntu ko yaka Sports Committee wa ya ki bor chnong wow sumaar syndong bha ya kani ka madan khnang u man ko i myntoi ya ki khon yong ka chnong waka thaaiñ hi waroh kawi.
Neiliang u Deputy Commissioner hei klam kam u symbood kongsan da kyntu u ya ki paidbah ka thaaiñ wow ya krehlang nadooh kiwa khian wa nai hadooh ki waheh hei wow pynmiat pynbha ya kani ka madan wei da yooluti u leh wa i em kam kani ka madan u nang mih chooh chooh kitæ ki khynroo wa em sap kiwa ye u rah naam rah burom yaka District waka jylla ha ki por ki sngi wa chakhmat.
Neiliang ka Sports Committee deilang waka dorbar chnong da pynsñiaw ko yei sñiaw burom wa i sñiawngooh yaka MLA ka thaaiñ wa em sakhiat ko yaka thong wow kyntu kynrong ya ki khon khynroo wa em yei sap i phong ha ki kaam yalehbol deiwa kitbok ya ka yow yoh ko yei doh i pran iwa chait wa khlan, khamtam yow nang ye ko u chakri ya ki paidbah ka thaaiñ ha waroh ki liang.
Discussion about this post