Ka Hygge Energy da ye ko wow pynkrehkaam ya kawa nyngkong dooh ka Peer-to-peer (P2P) Energy-Sharing Model ha ka chnong Sohrarim, East Khasi Hills, Meghalaya heiwa lyngba kani da ye wow pynpoi bordiñ wa da pynmih lyngba ka sngi wei da pyndait nyngkong ya ki tiar ki tar ha ka Community Learning Center kani ka chnong wei da pynpoi leh ya kani ka bordiñ cha ka Tirot Singh Syiem School kawa man ka skur wa chah ktah bha hawa chah pyndooh bordiñ khamtam ha ki por wa joor slap kawa jngai chiteiñ Kilometer na kani ka Learning Centre.
Na ka bordiñ wa ye u pynmih, 40% da dap wow pynche ya ka Community Learning Centre wei kawa sah ka 60% da ye wow pynemkaam neibynta kiwi wei yeini i phah bordiñ cha kiwi ki thaw da ye wow leh ha ka 19-04-23. Ha u Naisaphra 2021 da pyndait ya ka Renewable Power & Carbon Trading System wa kynthup ya ka Solar Microgrid ha kani ka Community Learning Centre.
Ka Sumarlin Syiemlieh, Principal ka Tirot Singh Syiem School da ong ko wa heipor wa joor slap, i chah pyndooh bordiñ leh joor bha i tangwa katni wa da yoh bordiñ lyngba ka sngi da yarap bha i khamtam heipor wa pynman Exam.
Ini man ko leh kam chibynta ka Smart Village Movement ka sorkar Meghalaya yow pynemkaam da ka Solar Energy yow pynduna yei chaniah ha ka bordiñ wa pynbiang da ka sorkar wei wow pynduna leh yei chah ktah ka rymaw.
Ka Daphinylla Dohling kawa lai skur ha kani ka skur da ong ko wa ym ye u chaniah yei bordiñ khamtam heipor slap heiwa i step wei janmiet da dooh bordiñ bait wei heipor wa doom ka sngi da chitom u chynna iyi thoh ha ka Blackboard wei wow khreh kot tangwa deiwa yoh bordiñ lyngba i bor ka sngi da pynsuk bha ko katni.
