Jowai: Ka yungkrehkaam ka Divisional Soil & Water Conservation, West Jaiñtia Hills District ya kawa da chna hei lut kamwa T. 4 Klur da wai ya ka ynne ka sngi da u Symbood Montri Rangbah ka jylla u Prof. R.C Laloo, hei emlang u Ronnie. V Lyngdoh, Minister ka Soil & Water Conservation Department, u Director ka tnat u George Kharmujai, u Additional Director u V. Papang, wa kiwi kiwi.
Hei klam kam u kongsan u Laloo da ekhublei u ya i kreh chitom u R.V Lyngdoh wa ki sahep kani ka tnat kiwa da kreh wow pynmyntoi ya ki paidbah ha kiwa boon ki liang. Da ekhublei kyrpang u leh ya u Lyngdoh wada elaad u ya oo wow wai ya kani ka yungkrehkaam neibhah wa ya u mooyurim leh da booh da oo ha u snem 2012.
“Ha waroh kini ki 25 snem wa da man O kam u Minister (Montri) kani to ka sien wa nyngkong wa da booh O ya u mooyurim wei da chna pyndep ya ka hapoh i por.” da ong u Laloo.
Hawa yaroh ya ka tnat kawa da kreh met wa mynsien iwa da yarap sakhiat ya ki paidbah da yooluti u wa hapoh i yahkhmat u George Kharmujai, Director kani ka tnat, ki sahep wa kiwa kreh u ye chooh chooh ki u pyndep yei kaamram yong ki.
U Lyngdoh hei klam yong oo da yaroh u ya u R.C. Laloo yeiwa da booddien u wow yoo wada ye u pyndep ya kani yungkrehkaam. Da yooluti u leh wa i heh i pchem kani ka yungkrehkaam daw e mynsien ko ya ki sahep wa kiwa kreh wow kreh chitom ki yow pynmih ya u soh wa jop u wow yoh ki paidbah u maad.
Kiwi kiwa da klam ha kani ka sngi toh u Dolloi ka Elaka Jowai u P. Kynjing, u Andrew Shullai, Deputy CEM, Jaiñtia Hills Autonomous District Council heiwa da yaroh ki ya ki kaam wa da leh kani ka tnat sorkar.
Ki sahep yong kani ka tnat na Garo Hills, Nongpoh, Nongstoin, Shillong wa East Jaiñtia Hills leh da wan sakhi ki ya i wai ya kani ka yungkrehkaam heiwa da em leh ki sahep na ka Cash and Territorial Divisional Soil and Water Conservation of Jowai.
Discussion about this post