U Judge ka Meghalaya High Court uwa man leh u Executive Chairman ka Meghalaya State Legal Services Authority, u Justice H.S. Thangkhiew ha ka 5 tarik uni u bnai da wai u ya ar tylli ki Legal Care & Support Centres wa em hapoh ka East Jaiñtia Hills District kitæ ha Jaiñtia Eastern College, Khliehriat wa ha St. Anthony’s Extension College, Byndihati hei emlang u E. Kharumnuid, Registrar General, High Court of Meghalaya cum Member Secretary, Meghalaya State Legal Services Authority, u A.M. Ripnar, Registrar (Judicial Service), High Court ka Meghalaya, ka C. Dkhar, District and Session Judge, East Jaiñtia Hills District cum Chairman District Legal Services Authrority wa u E. Kharmalki, IAS, Deputy Commissioner, East Jaintia Hills District, Khliehriat.
Kam chibynta ka Pan India Awareness and Outreach Program, “Azadi Ka Amrut Mahotsav” hapoh i pyrtuid ka National Legal Services Authority, ka District Legal Services Authority, East Jaintia Hills District da pynman leh ya ka yalang pdiang wei pynsñiawthooh ya kiwa dang thymme ki Para Legal Volunteers (PLV) ha St Anthony’s Extension College Hall, Byndihati, East Jaiñtia Hills District.
Neiliang u Justice H.S Thangkhiew hawa e ya ki ktien wai phang, da ong u wa ka Meghalaya State Legal Services Authority i thong ko toh wow e yarap dei mynkyna heiyatoh wa ki aiñ khamtam cha kitu ki dkhot ka imlang sahlang kiwa tlot wa kiwa em yei duna. Da ong u leh wa ki thaw bichaar wa em hapoh ka jylla da kreh chitom ki wow pynyoh yei bichaar hok wa salonsar.
Heiyatoh wa ki Legal Care and Support Centres da ong u, “Kini ki thaw toh ki wow yarap wow pynyoh yei kyrchaan wei yahluti heiyatoh wa ka aiñ khamtam ya kitu kiwa dang sahdien ha ka imlang sahlang wei i thong i e yarap toh yow yoh yei bichaar wa hok ya waroh”. Da khana u leh wa i e yarap toh nadooh i e buit, u thoh ya ki Notice, kammon wow e juab, kammon wow yaleh mukotduma wa kiwi kiwi. Da khana u leh wa ha ki Legal Care & Support Centres daw emlang u muktiar wa uwi u Paralegal Volunteer.
Da kyntu leh ya ki muktiar wa ya ki Paralegal Volunteers wow em ki yei kitkhlieh wei wow sñiawthooh yeiwa emkaam ki paidbah wei lada ye wow pynyasuk yow lait u poi chadooh ka yung bichaar.
Ha kani ka sngi da emlang leh u S. Pdang, Public Prosecutor, East Jaiñtia Hills District Khliehriat, Dr. P. Nongtdu, Principal ka Jaiñtia Eastern College, Khliehriat wa u Fr. George. S. Lyngkhoi, SDB, Principal ka St. Anthony’s Extension College Byndihati, ki Panel Lawyers, ki Para-Legal Volunteers ka District wa kiwa lai puræ ka Jaiñtia Eastern College waka St. Anthony’s Extension College, Byndihati wa kiwi kiwi de.
Kiwi de kiwa klam toh ka N. Momin, Chief Judicial Magistrate cum Secretary District Legal Services Authority waka B. Kharbithai, Judicial Magistrate First Class.
Ya ka yalang da pynkut deiwa pynkup burom ya ki Panel Lawyers ka District da u Justice H.S. Thangkhiew uwa da saam leh ya ki khusnaam cha kiwa jop ha ka yakob thoh Essay wa i thoh Slogan kiwa da pynman kam chibynta ka Gandhi Jayanti Day ha ka 2 tari u Naichiphaw October, 2021.
