Ynne ka sngi u Minister ka Health and Family Welfare, u Wailadmiki Shylla da wai u ya ka Health ATM Machine ha Jowai Civil Hospital, Ialong kamjooh ya ka MHIS Pharmacy ka wow wai 24 kynta.
Ha kani ka sngi da emlang ka Director ka Health and Family Welfare (MI), ka Dr. J. Momin, u Deputy Commissioner ka West Jaiñtia Hills, u Abhinav Kumar Singh, ka DMHO ka Dr. P. Shylla, u Medical Superintendent ka Hospital, u Dr. W. Lakiang wa kiwi.
Kani ka Health ATM Machine toh ka kor wa ye u thaw ya ka BP, i chini, i chit (Temperature), ECG, SpO2, Hemoglobin wa kiwi wei da thied ya ka hei lut iwa Rs 3.8 lak lyngba ka CM-Catalytic Fund.
Neiliang u Abhinav Kumar Singh da ong u wa deiwa em kani ka kor daw yarap ko chiboon ya ki paidbah heiwa lyngba yong ka daw ye u leh hadooh 60 tylli ki Test dei mynkna.
U Dr. W. Lakiang da ong u wa deiwa em kani ka kor daw ye u pynduna yei khia kaam kiwa kreh wei lada myntoi daw ye u pynku kyrdan ya ka heiwa daw em ar ngut ki Nurse wow pynkrehkaam ya kani ka kor wei hadien daw ye u pynemkaam suk ya kani ka kor.
U Wailadmiki hawa e i klam da ong u wa ynne da chong ya ka Review Meeting yong ka chnat hapoh ka East wa West Jaiñtia Hils heiwa da yaklam nadooh iwa emkaam kiwa kreh, ki dawai wa kiwi.
Da ong u wa deiwa leh ya ki Test ha kani ka kor daw pynduna ko yei lut i sep kiwa wan thooh dawai na kani ka Hospital heiwa du hapoh 10 minit daw ye u yoh ya ka Report deiwa ong leh wa ymtoh u chaniah du ha ka kor tangwa emkaam leh wow rah ya ka Report cha ki Doctor.
Da ong u leh wa daw booddien u yei pynkrehkaam ya kani ka kor wei lada chem wa yarap wei myntoi ko, daw ye leh u booh ya ka ha kiwi ki thaw sumaar kam i CHC wa PHC.
Chooh chooh da ong u wa dei sñiawkhia da ye u wai ya ka Pharmacy ka wow wai 24 kynta wei kani ka Pharmacy u man ko leh kawa ar ha ki thaw sumaar ka sorkar ka jylla ka wow wai 24 kynta.
Discussion about this post