Jowai : Ka chnong Jowai ynne ka sngi da yoh ko ya ka thaw yalehke wa rap phær kawa tip kam ka Concrete Pitch namo ka thaw yalehke Cricket kawa da siang da i khyndaw bilat wei da dep ker leh ya ka da ka jar.
Ya kani ka Concrete Pitch da pynyoh da ka All Jaiñtia Cricket Association (AJCA) lyngba ka Meghalaya Cricket Association na ka poisa wa yoh na ka Board of Control for Cricket in India (BCCI) katkam i pyntip u president ka AJCA u E. Shylla ha ka yalang wa tbian wa pynman ynne ka sngi ha madan Jrisaleiñ.
Da wan wai ya kani ka Concrete Pitch da u S.C. Laloo, ADM uwa da ong wa ki jait bru yong i leh toh kiwa ku bha ha waroh ki liang wei kani ka Concrete Pitch leh daw yarap ko ya kiwa ka-it u lehke Cricket wow pynbniah yei sap yong ki yow poi ki cha ki kyrdan yalehke wa ryngkat wa kiwi tawan hapoh ka ri.
U President ka Chutwakhu u D. Pyrbot da pyntip u wa ka dorbar ym em kyntiat ko heipor wa paan ka AJCA yei bynta wa harood yong ka madan wei kani ka madan leh toh kiwa wan yalehke bha kiwa na kylleiñ kylleiñ, kamtæ yow yarap ya ki khynroo khyllood yow pynbniah ha ki yalehke Cricket da e sñiawbha ya ka thaw chna ya kani ka Concrete Pitch.
Sa ka wi ka Concrete Pitch dang pynkhreh ha Khimmusniang wei ki paidpah ye ki u pynemkaam ya ki ha iwon iwon wei da kyntu leh ya ki yow syndong ki ya kini ki Concrete Pitch.
Ha kani ka yalang leh da leh burom ya dhab ka AJCA wa jop ya ka U-19 Inter District Cricket Tournament wa pynman ha Shillong ha u bnai Kmaichonglad yong u snem 2016.
Also Read: Rah ka dhab Cricket na Jaiñtia ya ka 1st Mawlynnai Marbaniang T-20
Discussion about this post