Jowai : Ka thaw wa tip kam ka Haven’s Cove wa em ha Kdong Umkhangrah, Jowai toh ka thaw wa ye ki paidbah u lai ke heiwa da em ki kamra wow sah miet, ka swimming pool, ka nan dakha wei kamjooh ye u yoh ya i baam wei ya kiwa kwah leh ya iwa rap phær da em leh ki kari 4 chaka wa tip kam ki ATV wa ye ki u yah.
Ya ka Haven’s Cove da wan wai da u D.M. Wallang, ADM ka West Jaiñtia Hills ha ka yalang wa pynman ha kani ka thaw hei emlang u R. Muthu SP ka West Jaiñtia wa kiwa hayung hasem wa ki lok ki jor yong ki tre kani ka thaw.
U Barima Laloo uwa man kam u tre yong ini i thaw da ong u wa nyngkong i thmu toh wow chna ya kani ka thaw kam ka Farm House don hi tangwa hadien wa yoo wa sdang ki bru u wanke cha kani ka thaw yow chondur wei da yah lok yah khon ki bru, da pyn pyrkhat noh ya oo yow chna pynmait noh ya kani ka thaw.
Da ong u leh wa da dep lithooh yarap ki na ka tnat Tourism yong ka jylla tangwa ym em wa bien ko u yarap ya oo deiwa ong ki wa ini toh i thaw baamdoh donhi wei ym ye u pynkylla de ka cha kawi tawon.
U D.M. Wallang uwa man leh kam u kongsan ha kani ka sngi da kyntu u ya ki tre deiwa ong wa ki toh u man ki kiwa kit khlieh khamtam ha ka kaam uiñke sawari deiwa pynbiang nadong chadong ya ki paidbah wa wan cha kani ka thaw yow sñiaw chngaiñ ki khamtam ya kiwa wan na baar jylla.
Ya ka yalang da pyllai da u Riquoma Rq. Laloo wei da yoh leh yei ngooh i dem na u Dawanpoi Passah.
Discussion about this post