Ka Kiang Nangbah Government College Jowai ynne ka sngi da yoh ko yaka thaw pynlang jhep wa da chna lyngba ka chnat PWD dei yarap u MLA ka Jowai, u Wailadmiki Shylla, wei ya kani ka thaw pynlang jhep leh da wai da oo hi ynne ka sngi chirup i emlang ka B. Blah, CEO Jowai Municipal Board, ka Dr. E.M. Blah, Principal Kiang Nangbah Government College Jowai, kiwa sikai, ki khynnah lai puræ wa kiwi.
Kiwa yahkhmat ka Kiang Nangbah Government College Students’ Union lyngba u President, u Precioustar Sten, wei lyngba ka Principal da pynsñiaw ki yei sñiawngooh ya u MLA wada chimkhia u u pynmankaam yei emkaam wa kani ka College da lai pynsñiaw ko cha oo.
Ha kani ka thaw pynlang jhep da bhah ar kamra kawi neibynta u pynlang yei jhep wa pyut wei kawi won neibynta ki jhep wym pyut.
“I eh i khoo lyngba i jhep toh kawa maad ha kylleiñ ki thaw ka pyrthai, wei kamwa man ha kiwi ki thaw yei jhep da pynkylla chaka spah haki rukom waphær, kamtæ neiliang ka Jowai Municipal Board leh da pyrchang lai pynsñiawthooh cha man ki dong, ki skur wa ki College wei daw pteiñ chooh chooh khnang wa ki paidbah u sñiawthooh ki i jhep toh i kam kiwa chnong chnong kiwa pynmih ki wei kammon u leh ya ki,” da ong ka CEO ka JMB.
Neiliang u Wailadmiki ong u hanla ym ye u wow leh kamwa kiwa yahkhmat kani ka College angnood ki leh, tangwa da pyrchang u katwa ye i bor wot hapyrdi i chah pynthut haki 2 snem chadien, deiwa kyntu leh yaki u kmen ki yei yi wada yoh næ iwa da em.
Pynsñiaw haroh u i kmen wa ka Union wa katni yong kani ka College toh kiwa sñiawthooh, deiwa kyruiñ leh chaki liang waphær neibhah boon hi manda em ki haki seiñ em bait ki itæ i sñiaw wa kat iwa leh ka sorkar leh u pyrchah bait ki.
Ha kani ka sngi u Wailadmiki da e kti haroh u yaki riam namo ki Jersey ha kiwa yahkhmat ka Kiang Nangbah Government College Student’s Union, kiwa da paan yarap ki na oo.
