Ka Khasi Hills Autonomous District Council (KHADC) daw ye noh ko wow pynkrehkaam ya ka aiñ neibynta ki thaw ki bhaw hadien wa u Lat ka jylla da e muhor wei da mynjur u ya ka Khasi Hills Autonomous District (Regulation and Administration of Land) Bill, 2021 yow man aiñ noh.
Hawa pynsñiaw yei sñiawkmen hajrong ini wa ye u pynman aiñ, u Chief Executive Member ka KHADC, u Titosstarwell Chyne da ong u wa ka aiñ u krehkaam ko chisyndon noh hadien wa da ye u booh ya ki Rules wei daw krehkaam ha waroh u pood u ang ka Khasi Hills.
Da ong u wa kani toh ka Bill wow sah kynmoo ha KHADC, neibhah hadien 70 snem da ye u yoh ya kani ka aiñ, hanla da pyrchang leh da ki Executive Committee wa da lai noh.
Katkam wa pyntip u CEM, hanla i khyndaw u chyiap haap ki hapoh i pait yong ka Council, tangwa hadooh katni ym pu em won katæ ka bor næ i tipmit. Da ong u wa ya ki Land Records Certificate kiwa da e waroh chi kattu da ka KHADC, ym tipmit ya ki wot da ki Bank lane kiwi ki thaw leh ym pdiang ki, wei da pynrap wa lyngba kani ka Bill, waroh ki kot ki sla wa yatoh wa i khyndaw u chyiap da e bor ha ki Kur, ki Rangbah Shnong wa u Syiem kiwa ye u pynskem wa ye u tipmit noh ha kiwon kiwon ki kaam wei ini daw yarap ya kiwa chong chnong.
Da ong u wa kiwon kiwon ki dulir wow e da ki Rangbah Shnong næ ki Kur daw hap wow pynpoi leh cha ka KHADC khnang wow ye booh thup wei wow yoh i pynskem.
U Titos da ong u wa kani ka aiñ daw em leh i mang khyndaw næ ka ‘Land Bank’, ha kawa ym em iwon iwon i leh embor yei thaw wei daw ye wow e leh ya ki bru ki wym em thaw.
Hawa kylli, u CEM da ong u wa lyngba kani ka aiñ daw ye wow pynpsiah næ Register leh ya ki thaw ha ki thaaiñ khappood, tangwa da ong u wa ka bai Register daw hap u chim tangwa hei dor wa duna wa jem bha.
