Ka jylla Meghalaya da yoh ko ya 150 tylli ki kor Oxygen Concentrators na ka World Health Organisation (WHO) ynnin ka 22 tarik kiwa dang booh chwa ha NHM State Warehouse kawa em ha Lawmali, Shillong.
Kini ki kor toh kiwa pynboon wei pynkhooid ki yaka la-ær Oxygen kawa pynpoi cha ki thaw thiah kiwa chitom kiwa emkaam ya ka Oxygen.
Hapoh ki Hospital wa em ha Meghalaya hadooh ynnin ka sngi da em ko 864 tylli ki pyllong kiwa pyndait lang wa ka Oxygen kiwa da sdang smat wow dap.
Kini ki pyllong wa emlang wa ka Oxygen deilang wa ki pyllong wa em ICU waroh dapoi ki 999 tylli hapoh ka jylla wei na kini da em kiwa chitom ha ki 743 tylli ki pyllong wei kiwa dang lait da em ki 256 tylli.
Ka Hospital wa em boon dooh ya ki pyllong wa emlang wa ka Oxygen toh ha NEIGRIHMS 130 tlli pynbood won sa ka Civil Hospital Shillong 103 tylli wa ka Nazareth Hospital 92 tylli.
Ha Ri-loom Jaiñtia ki pyllong wa emlang wa ki Oxygen toh ha Khliehriat 100 Bedded Hospital kawa em 20 tylli, wa ha yung krehkaam warim u DC, Khliehriat wa em 10 tylli. Ha West Jaiñtia Hills won da em 12 tylli ha Woodland WK Hospital, ha MCH Hospital Jowai 56 tylli katwa ha Dr.Norman Tunnel Hospital, Jowai da em 12 tylli.
Hawa kheiñ won ya kiwa yoh COVID-19 na kiwa chah Test iwa tip leh kam ka Case Positivity Rate, ha Meghalaya da man ko 20.5% iwa hapoh ka ri da man ko 11.34% deiwa kheiñ kyllum lang.
