U Montri ka sorkar pyrdi wa pait ya ka chnat Fisheries, Animal Husbandry & Dairying u Parshottam Rupala ynnin da wan u wow pynlait paidbah ya ki kari wa tip kam ki Mobile Veterinary Units (MVUs) ha ka yalang wa pynman ha Mahendraganj, South West Garo Hill.
Kini ki kari toh neibynta wow yarap ya kiwa ri mrad kiwa em cha ki thaaiñ palatsor yow pynpoi smat yei yarap cha ki mrad wa kjut wa chitom wei ha kani ka sngi da pynlait 17 tylli kini ki kari kiwa da yarap poisa da ka sorkar pyrdi 90%.
Yow ye ki bru wow yoh yarap na kini ki kari yei ki wow Phone ha u Number-1962 yow wan ki ha dwar yung yow e yei chakri.
Kawi pa kawi kani ka kari toh kawa da em ki tiar ki taar yow e yei sumaar wei daw em leh wa uwi u Doctor wa uwi u wakreh wa uwa yah kari kiwa da thung kreh pura.
Deiwa em kini ki kari, ka chnat Animal Husbandry & Veterinary daw ye ko wow lai e tika, u leh ya ka Artificial Insemination namo wow pyn punkhon ya ki mrad, u sumaar ya ki mrad wa kjut, da pyntip u Montri.
Da lai pait u leh ya ka Dairy Farm kawa em hajan Tura heiwa da chem u toh kawa da rim bha wei da ong u wa da toh i por wow pynthymme wei wow pynku kyrdan ka wei wow em ki Cooperative yow yarap ya kiwa ri masi wa pynmih dud.
U Montri da lai pait u leh ya ka yaaw ka haat namo ka Border Haat wa em ha khappood waka Bangladesh kawa em ha Kalaichar wei da lai pait u leh yei kær pood wa jrong 38 Km waka Bangladesh.
Neiliang ka Border Haat Committee da klam ki yei emkaam ki paikhana wa kiwi de ha kini ki yaaw.
