Ka jylla Meghalaya da yoh ko yei naam kam ka thaw kawa suk u seiñ khih wei kawa da sdang ku kam ka thaw wow leh ya ka khayi pateiñ namo ka “Emerging Business Ecosystem” wei yeini da pynbna ha ka Ease of Doing Business (EoDB) 2020 Assessment kawa da pynmih da ka Department for Promotion of Industry and Internal Trade (DPIIT), Ministry of Commerce and Industry, Government of India.
Ya kani ka Assessment da pynlait da ka Nirmala Sitharaman, Finance Minister ka sorkar India deiwa emlang u Piyush Goyal, Union Commerce & Industry Minister ha ka yalang wa pynman ha Delhi.
Ka DPIIT da pait ko ya 38 ki jylla wa iyi da leh ki yow pynsuk yei seiñkhih, i suk i rukom kreh wa ka khayi pateiñ ha ki 15 tylli ki jait wa emkaam ki bru wa seiñ khih.
Ka Meghalaya da pynsuk ko yei rukom e License/Approval cha ki jait khih wa khian kam ki dukan heiwa ye ki wow yaleh ya ka Online Application khlem da hap wow lai cha ki yung krehkaam ka sorkar. Ka e-Governance wa da sdang da ka sorkar da yarap kow wow pynsuk ya ini waroh deiwa booh dei por, kamjooh wow pait yei ujor ki bru khlem da hap dei yachem para bru wei ini da pynsuk ko ya ki karkhana wa khian leh kamjooh heiwa da lait u sepai ka poisa kamjooh i por.
Neiliang u Montri Rangbah, u Conrad K Sangma da e khublei u cha ki chnat sorkar, ki karkhana wa kiwa chong chnong ka jylla wa da poi cha kani ka moomær.
