Ka jylla Meghalaya da yoh ko yei naam Top Performer State haka National Startup Awards wa da pynman kam chibynta ka lehkmen National Startup Day 2024 kawa da pynman haka 16 tarik uni u bnai. Kam wow pynkynmoo wa ynnin u snem ka jylla da yoh ko yei naam Best Performer yow yarap ya kiwa kwah u seiñ khih.
Ka Meghalaya toh kawa em palat 72% kiwa chong chnong kiwa em hapoh 35 snem i rta wei da emkaam wow wai ki laad yow ye ki khynroo khyllood ka jylla wow seiñ khih heiwa u Montri Rangbah ka jylla, u Conrad Sangma da sdang u da ka Meghalaya Startup Policy 2018 yow pynman yaka jylla kam kawa yahkhmat hei yarap seiñkhih kat ha u snem 2023.
Da sdang leh yaka PRIME (Promotion & Incubation of Market-driven Enterprises) Program ha u snem 2020 neitæ ka Chief Minister’s E-Champion Challenge wei da pynbood da ka PRIME Incubation Program kawa da leh man-u-snem yow e laad ya ki khynroo khyllood ka jylla wow wan ki chakhmat yow pynyoo yei buit seiñ khih ki heiwa da yoh kyrchaan kamwa 5,500 ngut wow seiñ khih deiwa e ram kawa khlem sut.
Ha u December 2023, da phah ya ki soh Khontara wa mih napoh ka jylla kiwa em leh ya ka GI-Tagged Khasi Mandarin kiwa da dai ha ‘Zest Fest’ wa da pynman ha Bangalore. Ha uni u snem won da phah leh ya ki Strooiñ wa u chirmit Lakadong cha ki dukan wa em ha Middle East.
Hapoh ka PRIME da booh bhah leh 20% neibynta ki kynthai kiwa kwah u seiñ khih wei da em boon kiwa yoh myntoi nadooh kiwa thaiñ that kiwa man leh kam ki riam tynre.
Ynnin u snem da sdang leh yaka CM-ELEVATE da ka thong wow kyrchaan ya 20,000 ngut kiwa kwah u seiñ khih ha ki 5 snem wow wan deiwa e 35 hadooh 75% ka Subsidy ha ki 15 tylli ki jait kreh heiwa da em palat 30,000 kiwa wan yaleh ya kani ka Scheme.
Chwa wow yoh ya kani ka Top Performing State Award, ka Meghalaya da man ko leh kam ka ‘Focus State’ haka World Food India 2023 Event wa pynman ha New Delhi ha u November 2023. Ha uni u bnai won da yoh wa le ko haka One District One Product (ODOP) Awards wa da pynman kam chibynta ka Aatma Nirbhar Bharat Utsav 2024 ha New Delhi, wei kani ka Startup Award da man ko sa kawi ka moomær wa da ye ka Meghalaya wow poi.
Discussion about this post