Ka Public Hearing næ i pynsñiaw paidbah ynne ka sngi hajrong u pynyieñ kharkhana pynmih khyndaw-bilat thymme wa tip kam ka Meghatop Cement Pvt Ltd ha chnong Wahïajer wa em hapoh ka Elaka Narpuh, da man ko kawa yoh kyrchaan na waroh kiwa da yoh u klam.
Tangwa ki seiñbhalang waphær waphær won wa kynthup nadooh ka KSU, HITO, FKJGP wa kiwi wa thmu lai tia cha ka thaw Pynman Public Hearing neibynta u pynsñiaw yei pyrchah, da chah khang luti noh ki ha ki Volunteer yong ka chnong kiwa da ya mih ryntih wow pahara wei takit bniah ya ki bru wa wan cha katai ka thaw pynman Public Hearing.
Ki seiñbhalang da kyrpaad ki ya ki Volunteer wow chah u psiah ki neibhah kani toh ka Public Hearing neibynta ki paidbah.
Da ong haroh ki wa i wan yong ki wym mut wa thmu pynmih ki iwon iwon i kulmar, kamtæ neiliang ki Volunteer da jubab ki wow e laad psiah du ya uwa mut u klam donhi wa uwi uwa bood ya oo, neibhah lada e laad u psiah lut waroh da tikna wa daw mih kulmar.
Ya kani ka Public Hearing da pynman da ka Meghalaya State Pollution Control Board (MSPCB), ha ka yalang wa pynlai da u G. Warjri, Additional Deputy Commissioner, East Jaiñtia Hills District chirup i emlang ki dkhot ka MSPCB wa kynthup ya u Dr. G. H. Chyrmang kam u Member Scretary wa u Frankie Laloo kam u Environmental Engineer.
Kiwa e yei klam ha kani ka sngi wa kynthup nadooh kiwa chong chnong ka Wahiajer kamjooh ki khlieh shynchaar chnong waka Elaka Narpuh kiwa da e yei kyrchaan wa pura.
Discussion about this post