Ka Dorbar Chnong Pamrakmai deiwa ya krehlang waka District Child Protection Unit Office Khliehriat, da pynman ki ya ka pynsñiawthooh paidbah ynne ka sngi ka ha Yung Dorbar Chnong Pamrakmai heiwa da wan ya chimbynta da ki manbei ka Self Help Group, kiwa yalam chnong, kiwa kitkaam wa ki dkhot ka Iahunlang Village Organization, ki khynnah skur ka Pamrakmai RCLP&UP School wa yong ka Kyntiew Shaphrang L.P. School ryngkat wa ki paidbah wa chong chnong.
Ya kani ka yalang da pynlai da ka T. Nongtdu, Protection Officer, NIC wei da yoh ya ki ktien klam pdiang burom na u Secretary Chnong, u Wellson RD Siangshai.
Da yoh leh yei klam na u District Child Protection Officer, u T. Khyndiah hajrong ka ka aiñ Juvenile Justice Act, ka POCSO Act, ka Prohibition of Child Marriage Act wa kiwi kiwi kiwa yatoh wa i chah ktah ki khynnah ha ka imlang sahlang.
Kamjooh leh da yoh i klam na u W. Sympli, u muktiar neiliang ka District Legal Service Authority, Khliehriat hajrong ka phang Victim Compensation/Section 125 CrPC (Maintenance) ryngkat i klam na ka K. Pala, Centre Coordinator CHILDLINE Khliehriat, pynbood sa i klam sñiawngooh na u Waheh Chnong, u Iaikiewbha Rymbai.
Ka Dorbar Chnong da dap ko dei sñiawngooh ya ini wan pynsñiawthooh da ki bru chemphang hajrong kiwa boon ki phang wa yoh myntoi ki khynnah, ki manbei manpa wei kam kiwa chong chnong u ya krehlang khnang yow ye u pynduna u pyndoohjait ya ki kaam sih kam sang hapoh ka chnong waka imlang sahlang.
