Jowai : Ka phlim Documentary wa pyrtuid Fireflies in the Abyss wa da chna da u Chandrashekar Reddy da yoh ko ya artylli ki award wa heh ha kani ka Mumbai International Film Festival (MIFF) wa dang dep man.
Da yoh ko yei naam Golden Conch Best Feature Length Documentary wa yei naam Best Cinematography.
Ya kani ka Documentary da riñ ha ki thaiñ ka East Jaintia Hills nadooh u snem 2012 wei da pynkut ha ki bnai wa sdang u snem 2014.
Ka parom kani ka Documentary toh yei rukom im uwi u khynnah wa dang 11 snem u wa pyrtuid u Suraj uwa kreh kam u wa tih mooyong.
U Suraj ha kani ka phlim da pyrchang u ieh noh yei tih mooyong yow yoh laad u lai skur. Da thooh laad wei da paan yarap na kiwa emlang wa oo ha ini i thaw tih mooyong ki wa pynchlur ya oo u lai skur noh. Kiwa da heh hei tih mooyong da ong ki ya oo wa ini i rukom im ha kini ki krem ymtoh iwa bha neibhah ki leh silet ki wa ym em yoh laad ki u lai skur.
Da bood leh yei rukom im kiwa kreh tih mooyong wa sah cha ki thaw tih mooyong wei da pynyoo ya kiwa boon ki eh wa tyngkhooh ki ha i kreh tih mooyong ki.
[youtube id=”SUMpH_VSD74″ align=”center” mode=”normal” autoplay=”no” maxwidth=”1170″]
Discussion about this post