Ka Prof. Badaplin War, kawa man kam ka Professor ka NEHU, Shillong da pynkup burom ya ka da ka Padma Shri Award neibynta ki kaam thoh kot wa ki kaam wa da leh ko ha i puræ puthi wei da man ko samen napoh ka jylla wa da chah jied ha uni u snem.
Ka Badaplin War da man ko ka Lecturer ha NEHU ha u snem 1983 deiwa sikai ko hapoh ka Department of Khasi wei da man ko kam ka Professor ha u snem 2001, da man ko leh kam ka dkhot ka Khasi Author’s Society wei da dep ko wow thoh 9 tylli ki kot Khasi.
Ki khusnam Padma Awards toh kiwa ha khlieh dooh hapoh ka ri wa da e cha ki bru paidbah da ka sorkar India wei da em ki le jait kitæ ka Padma Vibhushan, Padma Bhusan wa ka Padma Shri.
Kini ki Award toh kiwa e cha ki bru wa kreh ha kiwa boon ki jait kaam; nadooh kiwa kreh kaam paidbah, i thoh i taar, i puræ puthi, ki yalehke Sport, i chait i khiah, i khayi pateiñ, i rep i riang wa kiwi kiwi.
Ya kiwa yoh Award da pynbna pyrtuid kam chibynta ka Republic Day man u snem.
Ha uni u snem kiwa yoh ya ki Padma Award waroh da em ki 128 ngut wa kynthup lang ya uwa yoh takma ksiar ha ka Tokyo Olympics u Neeraj Chopra.
Kiwa yoh ya ka Padma Vibhushan da em ki 4 ngut, kiwa yoh Padma Bhushan da em ki 17 ngut wa 107 ngut kiwa yoh ya ka Padma Shri.
Ka khaddooh wa yoh ya ka Padma Shri Award na Meghalaya toh ka Trinity Saioo.
