Kawi ka khyllood na Jowai ya kawa da tip pyrtuid kam ka Ribha-I Passah kawa man ka khon yong ka Delicia Joy Passah, wa chong wa sah ha Khimmusniang, Jowai da yoh ko yei kyrdan PhD ha ka Environmental Sciences na ka skurbah North-Eastern Hill University.
Ini i kyrdan wa yoh ka Ribha toh hajrong ka phang “Improvement of water quality affected by Acid Mine Drainage in Jaiñtia Hills, Meghalaya’ yeiwa da leh hapoh i yah luti (Supervision) u Professor O.P. Singh.
Ka Ribha da pyndep ko ya ka SSLC na KJP Synod Mihngi School, Jowai wei da pyndep ko ya ka HSSLC won na Kiang Nangbah College Jowai.
Da pyndep ko ya ka BSc (Environment Sciences) na St. Edmunds College, Shillong heiwa da Pass bha ko wei da pynbood ko ya ka MSc na North-Eastern Hill University deiwa yoh ya ka takma ksiar (Gold Medal).
Ini i kyrdan wa yoh ka Ribha man i ka nongmuna ya kiwi wow bood ki neibhah boonsien ha ki skur wa ki College wa da lai ko da yarap ki wow pynwandur ya i rukom man wei i rukom im yong ka hadooh wa poi ha kani ka kynti.
Da ong ko leh wa hadien wa yoh ko ya ini i kyrdan pynyoo i wa ki skur wa ki College ha Jowai ym em u kom ki na kiwi ha ka jylla.
Heijooh i por da kyntu ko ya kiwi ki wow man kiwa minot wei kiwa kreh chitom khlem sangeh khnang wow poi ha ka thong.
