Jowai: Ka Rotary Club Jowai kawa man kam kawi naki seiñ krehmon sñiawbha kawa embynta leh ha kiwa boon ki kaam wow yarap ya ki paidbah kawa da seiñ nadooh u snem 1995, ynnin ka 16 tarik hadien 20 snem i lai luti ka seiñ da yoh thaw ko wow chna yaka yungkrehkaam wa pura yong ka.
Ya ini i thaw da e sñiawbha da ka Phidalia Toi iwa heh kamwa 1000 Sq. ft. wa em ha Newhill Loomsooiung Jowai.
Kamtæ kam ka dak wow pynsñiaw yei burom, neiliang ka Rotary Club da pynman ko da ka yalang ha yungkrehkaam ka Rotary Club wa em ha Newhill heiwa da wan wai ya u moosah-naam wa e thaw ka Phidalia Toi wei ha i jooh i por kiwa na yung na sem yong ka da e kti ki leh ya ka dostabit wow pynsakhiat yeini i thaw ha u President ka Rotary Club u Rtn D.F. Majaw (PHF) hei sakhi lang ki dkhot ka Rotary Club wa kiwi kiwi.
Neiliang u Rtn S.K. Lato da pynkynmoo u wa ka Phidalia Toi jooh man ko leh kam kawi na ki dkhot warim kawa kreh chitom ha ka Rotary Club wei da man ko leh kam kawi naki dkhot wa chemphang bha ha kiwa boon ki liang wei da ye ko leh wow leh ya chiboon ki kaam wa bha haka imlang sahlang ha i por yong ka.
Neidaw wa ka Phidalia Toi ym ye ko u wan emlang ha kani ka sngi, kamtæ heithaw yong ka da wan noh da u khon yong ka, u F. Toi kam u kongsan yong kani ka yalang.
Discussion about this post