Kam chibynta yong i lehkmen 30 snem ka Shillong Press Club (SPC) da lehwarom leh ya ka National Press Day deiwa wai ya ka yung krehkaam ka SPC ha Directorate of Information and Public Relations, Shillong.
Nadooh u 1992 ka Shillong Press Club da chem chitom bha ko hei wow pynlai bait ya ki kaam yong ka neidaw wym yoh yung krehkaam wa pura wei hanla kiwa pathai khubor man ki u chrot wa soo ha ka synchaar paidbah, kiwa pathai khubor ka Meghalaya da chem chitom bha ki wow e ya ka Wyrta cha ki paidbah deiwa suk.
Hapoh u David O Laitphlang kam u President da wanrah chiboon ki kaam wei da pynsñiaw u leh wa emkaam ya ka yung krehkaam ka SPC wa pura ha Directorate of Information and Public Relations.
Ya kani ka yung krehkaam ka Shillong Press Club da wan wai da u Montri Rangbah ka jylla, u Conrad K Sangma haka 22 tarik hei emlang u Pravin Bakshi, Commissioner and Secretary, u Israel Ingty, Secretary wa u M Sangma, Director ka Information and Public Relations, Meghalaya wa kiwi ki dkhot ka Press Council of India kam u Jaishankar Gupta.
Kani ka yung krehkaam da em ko ya ka Conference Hall wa ka Audio & LED Projection System, ka kamra chongke, chirup wa ka kamra u President wa ki thaw kreh ya kiwa thoh khubor, wei da pynbiang leh ya ka Internet.
Ka SPC da krehlang ko wa ka Riti Academy wow pynphooh ya kani ka yung krehkaam yow dro ya ki dur ki dar ha kani ka Conference Hall hajrong ka yuyrim wa da dap 50 snem ka jylla wa khamtam kiwa yakhun wow yoh jylla.
Da booh leh ya ki dur yong ki Montri ka sorkar jylla Meghalaya nadooh u snem 1972, heiwa da emlang u Capt. Williamson A Sangma, u BB Lyngdoh, u Edwinson Bareh, u SDD Nichols Roy wa kiwi kiwi.
Da em leh ki dur u Prof Radhon Sing Lyngdoh, u Martin N Majaw, u P Ripple Kyndiah wa u Peter G Marbaniang. Chi bhah da em leh i dur u Hoover Hynniewta, u Darwin D Pugh, Stanling D Khongwir wa u Sanford K Marak.
