Ka Good Shepherd Higher Secondary School, Jongksha kawa em ha East Khasi Hills da jop ko yaka khusnaam Wipro Earthian Award 2020. Kani ka khusnaam toh kawa da e la 10 snem kattu kawa da sdang daka Wipro Foundation yow tipmit yaki kaam wa da pynkrehkaam hawa e sikai kiwa yarap yaka rymaw ha ki skur wa ki College ha India.
Ka Wipro Earthian man ko kawi na ki thong krehkaam yow pynchlur yei pynkrehkaam hapoh ki skur wa ki College yaki kaam yada wei wow pynneh pynsah yaka rymaw. Ha u snem 2020 da em palat 900 tylli ki Project kiwa da e yow yaleh wow yoh ya kani ka khusnaam heiwa da jied ya 20 tylli ki skur wa 8 tylli College da kiwa bichaar laitlooid.
Ka Good Shepherd School da pdiang ko ya kani ka khusnaam haka yalang wa da pynman lyngba ka Internet ynne ka sngi neidaw wa em ka khlam heiwa daw yoh yaka Certificate waka song poisa.
Ka Baiahunlang Kharahnoh, Ivoreen Kharsahnoh, Naphisabet Suting, Ibakyntiew Kharmulieh waka Tinamary Nongspung deilang wa uwa sikai yaki u Seiborlang Warbah wa u Teibhalang Warlarpih da pynkhreh ki yaka Project hajrong i spah ka Bei Rymaw.
“I jop ya kani ka Award da pynsñiawthooh ko ya i yeiwa emkaam wow leh yaki kaam wow pynneh pynsah yaka rymaw wei kam ki khynnah skur em i ka yukit heiyatoh wa ini,” da ong ka Baiahunalng Kharsahnoh, kawi na ki dkhot kiwa jop.
Hawa e khublei yaki dkhot ka skur kiwa jop kamjooh kiwa wanrah burom yaka skur, u Fr. George Jacob, CSC, uwa man leh u Principal da ong u wa ka skur booh ko hakhmat wow yarap yaki khynnah wow em ki yaka kitkhlieh kam ki dkhot ka imlang sahlang mynstep man kawi wei daw yarap ko leh yaki wow poi ki cha i thong.
