Ka Meghalaya Ecotourism Infrastructure Development Project (MEIDP) toh kawa man leh ka Externally Aided Project (EAP) kawa da yoh poisa yow krehkaam lyngba ka New Development Bank (NDB) wei waroh ka poisa wa da yoh yow pynkreh dapoi ko $98.80 Million (iwa man kamwa T. 731 klur) wei na kani $79.05 Million toh kawa da kyrchaan da ka NDB. Ya ka soskular wow pynkrehkaam ya kani ka EAP toh kawa da ya soi hapyrdi ka sorkar India waka NDB ha ka 10 tarik uni u bnai.
Ya ki EAP da pynkrehkaam ha ki jylla ka North East heiwa ka sorkar India da pynlait ko 90% ka poisa kam ka Grant cha ka sorkar jylla heiwa du 10% donhi u bahkhlieh da ka sorkar jylla.
Ka MEIDP toh kawa da khlieh da ka Meghalayan Age Limited (MAL), kawa da man kam ka Company ka sorkar jylla hapoh ka Planning Department kam ka Project Management Unit. Kani ka Project toh yow pynkrehkaam ya ki kreh ki wow pynku ya ki kaam uiñke suwari hapoh ka jylla cha ki kyrdan wym jooh em poi nachwa deiwa pynchna ya kiwa boon thaw uiñke suwari wa kiwa boonjait wa emkaam ki yow pynkylla dur ya ki thaw uiñke suwari.
Kam chibynta ini toh yow pynchna ya ki ‘Ecotourism Circuits’ ki wow taan ya kiwa uiñke suwari na kylleiñ ka pythai deiwa pynneh pynsah leh ya ka bei rym-aw wei wow yarap leh u syndong ya i spah ka rym-aw.
Iwa hakhmat dooh toh wow pynheh pynsaan ya ka yaaw ka haat kiwa em hapoh ki kaam uiñke suwari yow pynku ya ka nong iwa daw pynku leh ya ka jylla chei wym jooh yoo nachwa.
Ini waroh daw wanrah ko leh ki laad yoh kreh khamtam ya ki khynroo ka jylla ki wow pyndap pynbiang yeiwa emkaam kiwa uiñke suwari.
Ka poisa wa yoh lyngba kani daw pynemkaam yow pynchna ya ki thaw sah wa miat ha ki thaaiñ palatsor wei kani ka poisa da pynemkaam leh yow chna ya ka Shillong Peak Ropeway Project najrong kiwi kiwi.
