Ynne ka sngi ya ka Public Hearing ka Star Cement kawa da pynman ha Lumshnong da em ko ar bynta kawa nyngkong yow pynheh ya ka paar tih moochuni katwa kawa bood won toh hajrong i thmu kani ka karkhana pynmih khyndaw-bilat wow pynyieñ ya ka Line-II (wow pynmih Clinker 3.3 MPTA, Cement 2.0 MPTA wa WHRB 15.5 MW) ha kani ka karkhana iwa mut wow pynheh ya i pynmih Clinker, khyndaw-bilat wa ka bordiñ.
Ka Waste Heat Recovery Boilers (WHRB) toh ka rukom pynmih bordiñ da i chit wa mih heipor wa chna khyndaw-bilat ha ki karkhana.
Hadien wa chna ya ka Line II daw ye u pymku ya i pynmih Cement Clinker na ka 0.79 MPTA cha 4.09 MPTA, i khyndaw-bilat na ka 0.99 MPTA cha ka 2.99 MPTA, ka bordiñ na ka 4.67 MW cha ka 20.17 MW.
Neiliang u Waheh Chnong ka Lumshnong, da khana u ya ki kaam pynroi wa ki laad yarap wa da e kani ka karkhana ya ki paidbah ka chnong nadooh ki luti syngkieñ, ka yung dorbar, ka bai-baam tymmen, ki Scholarship wa kiwi kiwi ki kaam wei da khana u leh ya ki kular wa da kular ko wow leh hapoh ka chnong kam ki thaw sikai, wow thung kreh hadooh 25 ngut ha ka chi snem wa kiwi kiwi kamtæ ka Dorbar Chnong da rai ko wow kyrchaan ya ini i thmu kani ka karkhana.
Kiwa kitkaam ka Dorbar Chnong nadooh u Secretary, u Finance Secretary wa kiwi ki dkhot ka EC ka chnong da pdiang ki ya ini i thmu ka karkhana.
U S. Sumer uwa man u Secretary ka Elaka Narpuh da ong u wa neiliang ka Elaka hadien wa da yoh ya ka chithi na ka karkhana wow pynheh ya ka karkhana, neiliang ka Elaka leh da rai ko wow kyrchaan ya ini i thmu ka karkhana khamtam wow yoh kreh ki khon ka Elaka kiwa dooh khih dooh kreh ha ki por wa katni.
Kiwa boon kiwa klam ha ka sngi da pynsñiaw ki yei kyrchaan ya ini i thmu ka karkhana dei yooluti wow ye ko u yarap wei u myntoi ki paidbah ka thaaiñ.
Da em leh kiwa pyrchah ya ini i thmu yeiwa da pynsñiaw da ka seiñ JSU kamjooh leh da kawi na ki manbei wa chong chong ka Umlong.
Puræ leh: Lai bait ka Public Hearing ka Star Cement deiwa mih ryntih kiwa kyrchaan wa kiwa pyrchah
