Jowai: Ka Thadlaboh Presbyterian Higher Secondary School, Jowai da yoh ko wow lai mihkhmat ya ka West Jaiñtia Hills District haka State Level Science Seminar hadien wa jop ko ha ka yakob District Students Science Seminar wa pynman ynne ka 23 tarik ha North Liberty HSS.
Ya kani ka Seminar da pynman da ka yung krehkaam ka District School Education Officer, West Jaiñtia Hills District hajrong ka phang “Industrial Revolution (IR) 4.0. Are we prepared”.
Da wan ya chim bynta ha kani ka Seminar kamwa 10 tylli ki skur wa haap hapoh ka West Jaiñtia heiwa da pynyoo da batai ki ha jar jiar ki buit ki nia iong ki hajrong ka phang wa “Industrial Revolution (IR) 4.0. Are we Prepared.”
Hadien wa ki khynnah skur dadep pynyoo ki ya ki Presentation namo i batai yong ki wei da em won ka yalang pynkut heiwa ka B. Majaw, District Horticulture Officer, West Jaiñtia da man ko kam ka kongsan, chirup i emlang ka M. Pde District School Education Officer, Jowai wa kiwi kiwi.
Ha kani ka yakob yei naam jop da rah daka Thadlaboh Presbyterian Higher Secondary School, Jowai wada mihkhmat daka Paia Daka Hi Lhuid, wei da yoh wa ar skur ka North Liberty Higher Secondary School, Jowai wada mihkhmat daka Kearykindydiam Talang, wa le won da yoh ka St. Dominic Higher Secondary School, Mookyndeng wada mihkhmat da u Wanlam Jingshai Lyngdoh.
Lyngba i jop ka Thadlaboh Presbyterian Higher Secondary School, Jowai daw mihkhmat ko ya ka District ha ka State Level Science Seminar wa daw man ha ka 28 tarik uni u bnai ha Shillong.
Discussion about this post