Yoh ka wa krehkaam chnong thymme ka Jalyiah

Khliehriat: Ka Dorbar Chnong Jalyiah, East Jaintia Hills District, haka 16 tarik uni u bnai Wisu, 2020 da pynthymme ko ya kiwa krehkaam chnong wa thymme hadien waka samoi krehkaam u waheh chnong warim u Harvis Phawa da kut ko ha u bnai Kmaichonglad (Dec) u snem warim. Ka yajied waheh chnong haka chnong Jalyiah da pynman daka Election katkam Section wa 26 yong ka Jaiñtia Hills District Autonomous District Council, Jowai (Establishment of Elaka and Village and Election , Appointment, Powers, Function and Jurisdiction of the Dolloi/ Sirder and Waheh Shnong) Act 2015 wada pynkrrehkaam daka District Council.

Ya kani ka Election da pyntoh pyntne da u pa Dolloi ka Elaka Jowai u Puramon Kynjing chirup wa kiwa krehkam yong oo. Ha kani ka Election kiwa yaleh da em ki le ngut, heiwa u Shillong Dkhar da man u kam uwa jop deiwa yoh u 569 Vote, u Shirup Dkhar da yoh u 345 Vote katwa u Emmon Dkhar da yoh u 39 Vote. Ka Election man ko kawa lai bait lai ryntih khlem em iwon iwon wa wit wa thud.

Ha chwa wow pynbna u pa Dolloi ya uwa jop, da yoh ya i klam e khublei na u waheh chnong warim u Harvis Phawa. Ha i klam da ong u wa dap da i sñiawngooh wa khroo yaki EC Member warim khamtam ya ki paidbah wa chong chnong waroh kiwa da ya kreh chirup wa oo ha kini ki 13 tylli ki snem wa da lai wa kit u kam u waheh chnong, da e ki i kyrchan wa raad bah heiyatoh wow pynku yaka imlang sahlang hei burom, la hei khooid hei pliah ka roi ka paar khamtam heiyatoh wow wanrah ya i chongsuk chongsaiñ yong ka chnong ka thaw. Da kyntu chooh chooh u ya kiwa krehkaam thymme chirup ki paidbah wow nangthooh laad u wanrah yei burom ka chnong kham chajrong, i burom wada yoh ka chnong wym hoi u dooh noh ki wei wow neh i yaicah ki. Da ong u leh i chong ngiah yong oo naka kaam wym em iyi iyi i leh, wa da slem ki por wada synniang cha ka imlang wei da toh i por wow e laad chawi tawan neibhah ka kaam chakri paidbah man ko ka kaam mon sñiawbha wow synniang yaka sap wa em ha i wa da e sñiawbha u Blai. Ka chakri para bru man ko ka chakri ya u Blai.

Da e u leh i kyntien kitbok kitrwiang ya u waheh chong thymme wei kamjooh yaka Executive Body waroh wow nangkreh bha bar yeiwa dadep ha ki por wada lai, i burom wei i chongsuk chongsaiñ ka chnong ka thaw u man ko du lada em i yatylli pynkut ka wyrta khubor na u Harvis Phawa Chairman wa thymme ka chnong Jalyiah.