Ka West Jaiñtia Hills District Cricket Association (WJHDCA) da yoh ko yei thaw wa heh 5.93 Acre wa em ha Mukhla yow pynman kam ka thaw yalehke Cricket kam chibynta i thmu ka Meghalaya Cricket Association (MCA) wow pynyoh pynbiang madan ha ki thaw wa em cha palatsor yow pynchlur yei yalehke Cricket.
Ya kani ka thaw wa thymme da ya soi soskular ha ka 4 tarik uni u bnai hapyrdi ka Mukhla Dorbar Pyllun, ka West Jaiñtia Hills District Cricket Association deilang ka Meghalaya Cricket Association yow pynman ya kani ka thaw kam ka madan wa biang lut yeiwa emkaam yow yaleh Cricket.
Kani ka madan thymme u chna ka leh hei heh wow man kam ka Standard Size Cricket Ground.
Ka WJHDCA da em ko leh kawi ka madan nachwa ha Ummulong tangwa da hap wow pynsangeh noh u pynemkaam ka neidaw wa kiwa pynlai ka chnong da pyntip ki wa daw lai u sarok 4-Lane na kani ka madan.
Yei thaw kani ka madan thymme da jied hei yahluti da ka WJHDCA deiwa kyrchaan u MLA ka thaaiñ, u Wailadmiki Shylla deiwa ya krehlang ka Mukhla Dorbar Pyllun wei ya ka yalang soi soskular da pynlai u Eddystone Shylla, President WJHDCA deiwa emlang u Wailadmiki Shylla, MLA, u Naba Bhattacharjee, President MCA, u Rayonald Kharkamni, Vice President MCA, u Dhrubajyoti Thakuria, Treasurer MCA, u Weibor Sohlang, Secretary wa kiwa kitkam ka WJHDCA najrong u Hamran Shylla, President wa u Hachwa Suna, General Secretary ka Mukhla Dorbar Pyllun.
Neiliang u President ka MCA da pynsñiaw u yei sñiawngooh ya ka Mukhla Dorbar Pyllun yei bha mynsien ki wow e ya ini i thaw wa jan bha wa u sarokbah.
Chwa wow soi ya ka soskular da lai pait lai sylli leh ya kani ka thaw heiwa da hun wa man ko kawa biang yow pynman kam ka thaw yaleh Cricket wei hajan kani ka thaw da em leh ka madanbol wa dang chna.
Discussion about this post