Ka chnat Water Resources Department, West Jaiñtia Hills Division chirup wa ki dorbar chnong waphær waphær ka Jowai deilang wa ki dkhot ka Synjuk Ki Waheh Shnong Jowai wa u President ka Khooid Yaka Wah Myntdu ynnin ka sngi da lai pait ki ya ka Station wa da chna hapoh ka National Hydrology Project neibynta ka Hydromet Station ha Treiongriang ka Wah Myntdu.
Ha kani ka sngi da pynman leh yei pynsñiawthooh yei myntoi na ka ‘RTDAS (Real Time Data Acquisition System)’ da ka chnat Water Resource Department, Jowai ha Khimusniang Pohskseh Community Hall iwa yatoh chim yukheiñ yei rukom man ka um ha ki wah, ki nan wa ki tyllong um.
Ka Superintending Engineer (HPD), ka Junecy Lyngdoh, da pyntip ko wa ka thong yong kani ka sngi toh wow pynsñiawthooh ya kiwa chong chnong harood ki wah namo ki River Basin hajrong i chim yukheiñ khnang wow tip u leh yeiwa emkaam hadien habood ha ki rood ka wah wei khnang wow lait ki bru u pynsih næ tooh ya ki tiar wa em ha kani ka Station.
U Executive Engineer (WR), u P. Kurbah, da yaroh u ya u Dr. Hermon Khonglah uwa da e sñiawbha ya ini i thaw ha Treiongriang wow chna ya ka Hydromet Station.
Da batai u leh ya ki kaam wa da leh hapoh ka National Hydrological Project deiwa pynche leh wa ka National Hydrological Project (NHP) da pynkrehkaam ya ka ha waroh ka ri wa ha Meghalaya leh kamjooh. Da pyntip u wa kawi ka kreh hapoh ka NHP toh wow chna ya ki Hydromet Stations ha waroh ki wah ka jylla heiwa da em hadooh 25 tylli ki Hydromet Stations hapoh Meghalaya wei ha West Jaiñtia Hills em 3 tylli ki Hydromet Station kiwa dang chna ha ka wah Myntdu, wah Umyurem wa ha ka wah Myntang.
Da pyntip u leh wa em kiwi ki kreh hapoh ka NHP wei kini toh wow booh ya ki Automatic Rain-gauge ha waroh ki Station ha jylla wow thaw katwon hiar u slap wei ha West Jaiñtia Hills ha waroh kini ki 3 Station da em ki ya kini ki Automatic Rain-gauge. Kawi won ka kreh hapoh ka NHP toh wow pyndait ya ki Piezometer wow chim yukheiñ ya i em ka um hapoh khyndaw heiwa ya kini da booh ya ki ha ki ar thaw, kawi ha yung krehkaam u Sub-Divisional Agricultural Officer, Amlarem kawi won ha Government Girls Higher Secondary School, Mynthong.
Ha kani ka sngi da emlang ka Additional Deputy Commissioner, DD Syngai, u President Synjuk Ki Waheh Chnong Jowai, u A. Niangti, u President, Khooid Yaka Wah Myntdu, u K.L. Pariat wa kiwi kiwi.
