Ka Dorbar Chnong Umkiang, East Jaiñtia Hills District, da pynsñiaw ko yei sñiawkmen ya u MLA ka thaaiñ u Shitlang Pale, hajrong i e yarap (Scheme) ya ka chnong Umkiang da ka kari kit jhep. Ka chnong da ong ko wa ini toh i myntoi wa khroo tam ya ka chnong Umkiang, khamtam heiliang i khooid i suba i soodong sookun yong ka chnong Umkiang.
Ka Dorbar Chnong Umkiang, da pynsñiaw ko leh yei e khublei kyrpang ya u MLA, uwa da man sakhiat uwa mihkhmat yong ka thaaiñ, neibhah wa ym du ka kari e yarap u, da pynyoh u leh ya u sarok chnong (Internal Road) hapoh ka chnong Umkiang wa kiwi kiwi de ki yarap ya ki chnong ki thaw hapoh ka thaaiñ.
Ynne ka 1 tarik, da ah Ribbon ya kani ka kari ha ka yalang wa yahkhmat da u Secretary Chnong, u Nicholas Lyngdoh kam uwa maitphang ya i lai luti wow yoh ya kani ka kari. Da yoh i klam wa tbian na u W. Rymbai (EM) heiyatoh wa i lehbha u MLA wei da yoh leh ya ki kyntien e khublei wa i ah Ribbon da u Waheh Chnong u Lasting Pala.
Ha kani ka yalang da emlang leh u Asst. Secretary u Ellend Mynthlu, ki dkhot Committee ka Dorbar Chnong Umkiang, ki Waheh Dong, ki Secretary Dong yong ki 10 tylli ki dong, ki dkhot Committee yong ki chnat waphær waphær yong ka Dorbar Chnong Umkiang, ki VDP Umkiang wa u President wa Secretary yong ka Seng Samla Chnong Umkiang.
Kamtæ ka Dorbar Chnong Umkiang, da kitbok kitrwiang ko ya u MLA wow nang chait nang khlan u yow ye u chakri ya ka Constituency hi waroh.
