Ka Gamchi Timre R. Marak, Head Teacher ka Educere Higher Secondary School kawa em ha Samanda Williamnagar, East Garo Hills, Meghalaya da yoh pdiang ko ya ka “National Awards to Teachers” wa da saam da ka President ka ri, ka Droupadi Murmu ha Vigyan Bhawan, New Delhi deilang wa 45 ngut kiwi ynne ka sngi kam chibynta ka Teachers’ Day.
Neiliang ka Marak da pynsñiaw ko yei kmen wa da yoh yeini i tipmit deiwa ban joor yei emkaam ka puræ puthi wow pynkylla dur ya ka chnong Williamnagar hadooh wa man ko katni.
“Nachwa kani ka thaw yong i toh kawa sahdien bha wei du ki kattu katni kiwa da dep yei puræ puthi. Hadein wa u kurim O da yoh kreh sorkar u da rai i wow sah noh cha ini i thaw wei da jied leh ya ka Williamnagar,” da ong ka Marak.
Da khana ko wa ka toh kawa jooh kreh NGO wei kiwa chong chnong da kwah ki ya ka wow man kam kawa sikai kamtæ da rai ko wow wai da ka skur wei ha itu i por wa dang duna bha ki skur wei ym em itæ i mynsien wow kwah lai skur.
Kamtæ da ong ko wa i thong toh wow pynman ya ki khynnah kiwa em itæ i skem wei chaniah ha idæ yei bor yong ki yow ye ki u poi cha ka thong.
Da ong ko leh wa i lai skur ym kut i du hei khreh kot tangwa emkaam leh wow sikai yei akor kamjooh wow e ha ki khynnah yei sap kamjooh i syllok wei da khut ko hadooh ki Youth Counselors wow yarap ya ki khynnah heiyatoh wa i chait i khiah i bor pyrkhat, kammon wow yow yait na ki kaam wa sih kam i drugs wa kiwi kiwi.
Najrong ini da wanrah ko leh yei sikai hei tem, hei put, i rep wa wow yalehke Taekwondo.
Ka Gamchi Timre R. Marak man ko du ka samen wa yoh ya kani ka khusnaam na Meghalaya.
