Ka seiñ HANM Narpuh Circle ha ka miet yong ka 9 tarik hapoh i yahkhmat u Assistant Secretary, u S. Sumer wa kattu katni ngut ki dkhot da yoh ki wow kem ya uwi u baar jylla na kiwa boon wa mut wow lai kreh ha Amrit Cement kawa dang haap haka chnong Mynkre, wei katwa ki dkhot ka seiñ dang mut ki wow kylli ya ki neidaw wa boon ki wei da miet tangwa syndet syndet kini ki baar jylla da yut lut ki waroh wei hawa kdong ya ki da yoh wow ksoh du ya uwi wei hawa takit ya oo da chem toh uwa pyrtuid Mangal Rabidas uwa na Assam uwa da mut wow lai kreh ha kani ka karkhana.
Hawa phah wow pynyoo ya ki kot ki sla ym em u ya ki kot kiwa biang wow pynsakhiat wa wan kreh u ha katai ka thaw, kamtæ da yah ya uni cha ka Lumshnong Police Station yow phah liwan oo cha ka chnong wa wan u.
Ha ini i por u Assistant Manager ka Amrit Cement uwa tip pyrtuid kam u Amit da Phone u ya ki dkhot ka seiñ wei da wan yachem u wa ki wei da paanmaap wei da pyrchang u wow pynbaam T. 5000 yow pynlait ya utai u Mangal Rabidas yow yoh u lai kreh khlem da biang ki kot ki sla leh wei ini da pynchrai ya ka seiñ wei da beh ya utai u Amit.
Ya u Mangal Rabidas da chimkti noh da ki pulit yow phah liwan oo wei ka seiñ da maham ko wym e laad ko ya kiwa wan kreh khlem biang ki kot ki sla.
Ka seiñ da ong ko leh wa ki karkhana pynmih khyndaw-bilat lada lai thooh kreh da ki tre chnong da ong bait ki wym em kreh wa lait wei da beiñ ki leh ya ki bor ka aiñ kiwa toh u pait ya ka Labour License ki wym jooh em lai pait ya kiwa kreh ha ki karkhana pynmih khyndaw-bilat iwa pynyoo wa em i baam-tooh, ong ka kyrwoh na u Publicity Secretary ka seiñ, u Spelbha Pala.
