Jowai: Ka JSU- War Jaiñtia Circle da chem ki ya uwi u nong Bangladesh ha Dawki uwa da tip pyrtuid kam u Md. Aksar Nur uwa dang thmu u wow lai cha Bangladesh lyngba ka Land Custom khlem yohbor næ tip ka sorkar.
Ka seiñ da phylla wa uni u bru da kam u wa wan u na Nagaon, Assam wei da poi u hadooh ha Dawki khlem yohbor næ yoh ya ki kot ki sla kiwa biang.
Da kylli ka seiñ kammon wa uni u bru da yoh u wow psiah cha Meghalaya na Assam khlem tip ki bor kam ha Byrnihat næ Ratacherra deiwa suba wa wan u na Bangladesh namo na ki thaw hapoh ka jylla Meghalaya hi.
Da ong ko leh wa uni u bru da kam u wa wan u cha India nadooh ka 23 Thohlakhmi (Feb) 2020 katkam wa da kdaw ha ka passport yong oo wei yoodur da sahkut noh u ha India neidaw ka Lockdown.
Kamtæ ka seiñ hapoh i yakhmat u President, u Eddy Kery Pohtam da pyntip noh ko cha ka Dawki Police Station wow leh yeiwa emkaam.
