Ka kyrwoh naka chnong Tuber Kmai Shnong kawa em hapoh East Jaiñtia Hills District da pyntip wa hadien wa yoh ko chiboon ki ujor naki paidbah yong ka thaaiñ East Jaiñtia Hills kamjooh i pyntip na ki pulit wa em kibru kiwa lute wei tooh phniang kari ha tymbud u sarok NH-6. Neiliang ka VDP waki dkhot ka chnong da pynman ki yei yang miet wei ynne i step synyaw kamwa 2 waje i step da chem ki ya kiwa tooh wa kiwa lute ha Petrol Pump Tuber Kmai Shnong heipor wa dang tooh phniang kari ki.
Hadien wa wan ki dkhot ka chnong, kini kiwa tooh da yut ki hapoh kawi ka kari Maruti 800 wa kawi ka kari TATA Sumo wei da ieh ki chadien ya kawi ka kari Sumo.
Neiliang ka chnong ym e laad ko wei da kdong ko ya kini ki bru cha dooh cha wah Myntang deiwa wan kdong lang sa ki pulit ka Ladrymbai hapyrdi u slap wa joor heiwa da chem yaka kari Maruti 800 kawa da haap chapoh dooid wa da ieh kini ki bru, katwa yaka Sumo won ym em de chem kamjooh ya ki bru.
Ya kani ka kari Maruti da chem chwa wow poi ka wah Myntang cha palat Laskein.
Yaka Tata Sumo kawa ieh ha Petrol Pump toh kawa em ar tylli u number ML-04-7949 (u number sakhiat) wa u ML-04A-6874 (number thok) katwa ka Maruti 800 wa yoh kem toh kawa em ya u number ML-10-7887.
Ha ini i jia, ym em yoh u ksoh yaki bru kiwa embynta ha kani ka kaam lait noh i phniang Diesel kiwa em hapoh jerkan boon tylli.
Neiliang ka Dorbar Chnong Tuber Kmai Shnong da kyrpaad ko ya ki bor ka aiñ wow chimkhia bha ko ya kam kini ki jaitbru kiwa chim kabu ha kam kini ki por Lockdown wei booh ki leh hei maa ya ki bru hawa lai wa wan ki niebhah kini ki bru da em ki 3 kari wei da sñiawthooh da man ki kam ka Gang.
Kamjooh neiliang ka Dorbar Chnong Tuber Kmai Shnong deiwa ya krehlang chirup waka aiñ, da ong wa ym e laad ko ya kam kini ki jaitbru u wan cha ka thaaiñ ka chnong wot lada hap wow yang miet yang synyaw leh.
Da suba leh wa kini ki jooh toh ki bru wa lute ya kawi ka truck kawa jem tyre kawa hap sangeh cha rood sarok.
