Ha iwi i yoh kem drugs wa heh bha, ki pulit ka ANTF ka East Jaiñtia Hills District deilang wa ki pulit ka Lad Rymbai ynne da yoh ki wow kem ya ar ngut kiwa dai drugs wa tip kam u M. Tuanbiaklian Guite (32 snem) uwa na Churachanpur, Manipur wa u Imliakum Longkumer (40 snem) uwa na Dimapur, Nagaland.
Kini ki ar ngut toh kiwa wan da kawi ka kari TATA Winger wa em ya u Number NL-07T-0815 kiwa da chah pynsangeh ha BMS Petrol Pump wa em ha Nongsning heipor kamwa 6:15 i janmiet.
Hawa kynreh ya kani ka kari da chem ya 200 tylli ki khieh sabon wa em i lakhit wa khleh rong stem rong umsoh kiwa da kynset ha kylleiñ ki bynta ka kari.
Hadien wa Test ya kini ki lakhit da chem toh i Heroin wei iwa khia 2.738 kg iwa chongdor T. 15 klur wei ya ka takit da pynman da ka Khliehriat Police Station.
Na kini da kem leh ya 2 tylli ki Mobile Phone waka poisa kawa T. 2500 deilang wa ka kari wa pynemkaam ki.
