Ki pulit ka East Khasi Hills ynne ka sngi da yoh ki wow em ya uwi u bru wa pynyap ya u khynnah khian ha Nongrah.
U Superintendent of Police ka East Khasi Hills, u Vivek Syiem da pyntip u wa ki pulit ka Special Investigating Team (SIT) hadien ka takit wa hadooh 6 bnai, da kem noh ki ya u Kenedy Khongsit (32 snem) na yung wa sah u hajrong i emkti wow pynyap ya u khynnah khian uwa dang 7 snem uwa na Nongrah heiwa yei metyap da chem na rood sarok ha Mawpat ha ka luti wow lai cha New Shillong.
U SP da ong u wa da chitom bha wow takit ya kani ka Case neibhah wym chem yei daw wow pynyap ya uni u khynnah khonswet, wei da ong u leh wa la kattu katni bnai da suba tangwa ym ye wow pynsakhiat, tangwa ka SIT da pteiñ ko wow pynlang ki sabut wei da chem wa i daw wa pynyap u ya uni u khynnah toh neidaw wa tam sneiñ u hawa khut ya oo wow wan yaraplang yow sait ya ka Top.
Da ong u leh wa uni u bru toh uwa chitkhlieh wei uwa leh ki kaam manda chrai u.
U SP da khana u wa da chah pynyap uni u khynnah deiwa kset yei ktien u wei thap hapoh kani ka Top wa em um chiteiñ heiwa da antaad wa uni u khynnah da yap u chwa wow thap hapoh ka Top, hadien won da booh yei metyap hapoh tyngkong yung tangwa neidaw wa wan kiwa emyatoh u, da thap u yei metyap hapoh churia wei da paan u da ka Scooty u payu ar bei yow lai noh yei metyap hei thaw wa chem ki.
Chooh chooh da ong wa u Kenneddy Khonsit da em boon ki kaam wa leh u manda chikhlieh u hadooh wow tba kti ya ki bru tangwa ym em wa pyntip cha ki pulit neidaw wa ye wow yasuk wei da khana u leh wa ka kurim yong oo leh da yut ko neidaw wa joor chitkhlieh u.
Kam wow pynkynmoo wa yei metyap uni u khynnah uwa tip kam u Kyrshanbor Kharmudai da chem ha ka 9 tarik u October 2025 na rood sarok wei uni u khynnah toh uwa sah wa ka Beisan u ha Lummarboh, Nongrah.
Discussion about this post