Ynne ka sngi heipor kamwa 5:00 waje i janmiet, ka Village Defence Party (VDP) ka chnong Sonapyrdi wa em ha East Jaiñtia Hills District da yoh ki wow kem ya uwi u nong Bangladesh uwa da psiah pyrchah aiñ na Bangladesh cha India lyngba ki chnong khappood ka India-Bangladesh.
Da yoh wow kem ya uni heipor wa ka VDP Sonapyrdi dang lai leh Patrolling ki hapoh ki thaaiñ ka chnong hei yahkhmat u President ka VDP, u Boikmen Mynthoi wa u Assistant Secretary, u Stephan Lamare ryngkat ki Naik wa ki Volunteer ka VDP.
Hadien wa da yoh kem da takit ya uni u bru uwa da khana wa da wan u na Bangladesh wei da mut u wow lai cha Ladrymbai. Kamtæ da e kti ya uni u bru cha ki pulit ka Lumshnong yow leh yeiwa emkaam.
Neiliang ka VDP Sonapyrdi da phylla ko wa kammon uni u Bangladeshi da yoh u wow psiah cha India ha kam kini ki por wa em i kynaad ha Bangladesh, kamtæ da kyntu leh ya ka sorkar wow pynkhlan ko ya ki bor aiñ wow sonteri ya u pood ha ki thaaiñ Sonapyrdi khnang wa neini chakhmat ki nong Bangladesh ym yoh de ki wow psiah cha India lyngba ki chnong khappood wa em ha ka thaaiñ neibhah wa ki BSF kiwa em hajan yingkieñ Sonapyrdi ym ye ki wow kdoh u khoom wei wow khang yei wan psiah kiwa na Bangladesh.
Discussion about this post